بخصوص أول امتحان ثانوية عامة وأي امتحان بعد كدة

  


بخصوص اول امتحان و اي امتحان بعد كدة .. 

١- اول يوم هتلاقي الدنيا زحمة و في توهان و اجهزة تفتيش و تعليمات من كل حتة متخافش من حاجة انت اسد حاول تروح بدري عشان تخش بدري و متتوترش .. 

٢- و انت داخل المدرسة هتلاقي اصحابك او اي مجموعة واقفة تراجع مع بعضها و معاهم ملازم و حاجات جامدة كدة و بيقولوا معلومات غريبة سيبك منهم و متراجعش معاهم و متراجعش مع حد الا لو حد بيحضر معاك كل الدروس من اول السنة و عارفه كويس البيست بتاعك يعني وسيب ١٠ دقايق قبل الامتحان متراجعش فيهم حاجة خالص ، اشرب مياه و خش الحمام ده مهم جدا ..



٣- الامتحان هيبدأ هتلاقي ناس بتحاول تغش و تعمل دوشة و ناس تانية بتعيط و ناس تانية بتتخانق مع المراقبين و محاضر غش، متركزش غير فامتحانك و بس كأنك قاعد لوحدك و امسك اعصابك مهما حصل و مهما كان شكل الامتحان لأنك عامل اللي عليك و زيادة. 

٤- لو اتيحت ليك فرصة غش انا بقولك اهو متغشش و سيبها ع ربنا هيكافئك ع ده اوي اوي والله ، اقرا السؤال كويس مرتين و بعدين حل و بعدين اقراه مرة كمان بالحل بتاعه

٥- هتخرج م اللجنة هتلاقي شوية عيال بتراجع و اصحابك جايين يراجعوا معاك ، متراجعش مع حد نهائي و انسي اللي حصل و فكر فالمادة الجاية

٦- بعد الامتحان هتلاقي عيال ع السوشيال بتقول ده اسهل امتحان فالدنيا يعم ازاي تغلط فيه ، و ناس تانية بتقولك كدة احلامنا ضاعت و مش هنلحق حاجة ، سيبك من اي كلام لأن الاتنين بيكدبوا و متفتحش سوشيال بعد الامتحان خالص ولا تكتب بوستات صيااح نهائي 

٧ - متقولش رأيك فالامتحان خالص لأنك ممكن تحبط حد تاني مهما كان رأيك ، وفره لنفسك منه راحة بال و توفير وقت ليك كدة كدة رأيك مش هيغير حاجة 

٨ - نماذج الاجابة هتنزل الاول من المدرسين و بعدين من النموذج الاصلي بتاع الكنترول ، متراجعش معاهم نهااااائي و انسي لأنك كدة كدة مش هتقدر تغير حاجة انت عملت اللي عليك و خلاص

٩- مهما كان اللي عملته فالامتحان انساااه خالص انت تعبت و مكنش فأيدك تعمل اكتر من كدة ، هتقعد تحسب درجات و ربنا هيكرمك بدرجات تانية خالص والله ثق فيه بس و اتعب للمادة الجاية عشان ربنا يكرمك فيها

حبيبي كلنا مقدرين مجهودك و تعبك و الظروف اللي مريت بيها خلال السنة و فرحانين بيك والله ، عملت ايه و هتعمل ايه فالامتحان دي حاجة مش فأيدك فمتخافش منها ، انت عملت اللي عليك و زيادة .. ثق فربنا اكتر .. هيكرمك متقلقش ❤ 

تحميل نماذج وإختبارات حصص مصر PDF لغة عربية ثانوية عامة  

https://drive.google.com/file/d/1PouvVQtEF60mWFh23b0-QZaCvSwBWVH4/view

جميع ملخصات علمي 

هنــــــــــــــــــــــا


تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -