وجه أحد الطلاب رسالة إلى طلاب الثانوية العامة الراغبين في دخول كلية الطب هذا العام بعد ظهور نتيجة الثانوية العامة قائلا :
أنا اسمي عبدالرحمن عصام الجميعي طالب في الفرقة الرابعة بكلية الطب.
حابب أكلم عن كلية الطب التي تمثل حلم كبير لطلبة الثانوية العامة للشعبة علمي علوم.
بداية كلية الطب صدر قرار سنة ٢٠١٨ بتغيير نظام الدراسة و أصبحت الكلية ٥ سنوات دراسة و سنتين إمتياز
طيب إيه هو مضمون السنتين ؟..الإجابة تتوزع الدراسة إلي مواد أكاديمية و مواد إكلينيكية،المواد الأكاديمية كالتشريح و علم وظائف الأعضاء و عليم الأنسجة و الكيمياء الحيوية و علم الادوية و الكائنات الدقيقة و علم الأمراض و علم الطفيليات و هذه هي أساس دراسة الطب الإكلينيكية
هذه المواد وفقا للقرار الجديد بتدرس في أول سنتين أو ثلاث سنين علي حسب الجامعة و يتم تدريسها في صورة modules ..يعني إيه modules🤔!
حجاوب و أقوللك زمان كانت الدراسة الأكاديمية أول ٣ سنين و كان الطالب بيدرس في أول سنتين تشريح و علم انسجة و كيمياء حيوية و علم وظائف أعضاء و بيجي علي سنة ثالثة يدرس علم الادوية و علم الكائنات الدقيقة و علم الطفيليات و علم الأمراض...و كان بيدرس كل مادة لوحدها زي ما انت في ثانوية عامة بتدرس كيمياء لوحدها و فيزياء لوحدها
المهم جه القرار بأن المواد دي يتعملها integration! يعني ايه؟🧐
الإجابة: حديك مثال عندك موديول حتخده حيبقي صعب شوية اسمة CVS يعني القلب و الأوعية الدموية و ده بتاخد فيه كل المواد السالف ذكرها 💔 بس في حاجة بتاخد من كل مادة الجزء اللي له علاقة بالقلب 😀 يعني في التشريح تاخد تكوين القلب و في علم وظائف الأعضاء تاخد كيفية عمل القلب و هكذا في باقي المواد . يعني كل مادة بتساهم في الجزء اللي تقدر عليه في الموديول ده
نيجي للسؤال المهم ....إيه هي الموديولات اللي عليك
MSK= ده موديول خاص بالأطراف و الاعصاب و الجلد
FHB= ده عبارة عن مقدمة للطالب
CVS=ده مختص بالقلب و الاوعية الدموية
RES =ده مختص بالجهاز التنفسي
HIM=ده مختص بالجهاز الليمفاوي و الدم
GIT:ده مختص بالجهاز الهضمي
ENDO:ده مختص بالغدد الصماء بالجسم
CNS=ده مختص بالجهاز العصبي المركزي
REP=ده مختص بالجهاز التناسلي الذكري و الانثوي
URO=ده مختص بالكليتين و جهاز الاخراج
ده كان بالنسبة لسنوات الدراسة الأكاديمية ..
نيجي للسنوات الإكلينيكية و دي إنت بتبدأ تدرس فيها تخصصات الطب زي الباطنة بأفرعها و الجراحة بأفرعاها و النساء و التوليد و الأطفال و الرمد و الأنف و الأذن و الحنجرة......إلي آخره
و لازم علشان تبقي كويس في كلينكال تبقي عندك strong base في الأكاديمك
يعني علشان تبقي شاطر في الجراحة لازم تبقي شاطر في التشريح..مش مادة و تعدي .لا دي كلها منظومة مترتبة
و لازم تبقي عارف الطب تراكمي و كل يوم في جديد ولازم تبقي updated كل شوية عن طريق المجلات الطبية و الأبحاث العالمية و المؤتمرات ..
⛔⛔و خلي بالك نظام الدراسة بكلية الطب لا يعترف بمجموع الثانوية العامة يعني ممكن تكون جايب ١٠٠% و في الآخر تيجي الكلية و تطلع بمقبول أو متعديش أصلا و ممكن تبقي يدوب لاحق الكلية و في الآخر تطلع بإمتياز
بالنسبة لكلية الطب البشري فهي موجودة في أغلب الجامعات الحكومية المصرية و أعلي كليتين طب من حيث المستوي هما كليتي طب القصر العيني بجامعة القاهرة و كلية طب جامعة عين شمس ، أما بالنسبة للجامعات الخاصة فأقدم كليتين طب هما كلية الطب بجامعة مصر للعلوم و التكنولوجيا و كلية الطب بجامعة ٦ أكتوبر و دول معتمدين بس في كليات تانية زي كليات الطب بجامعة نيوجيزة و mti و جامعة بدر و حاليا جاري إنشاء كليات طب بجامعات الأهرام الكندية و الدلتا و جامعة جبل الجلالة
دي رسالة حبيت أوجها لطلبة ثانوية عامة قبل دخولهم الجامعة
ربنا يوفقكم و ميضيعلكمش تعب و يخليكوا تكونوا سبب في فرحة أهاليكم