أكثر الاسئلة شيوعا واجابتها:
1- التقديم للهجرة امتى؟
* من شهر اكتوبر لغاية نوفمبر
2- النتيجة امتى؟
* غالبا بتكون في مايو، بيعلنوا عن التاريخ بالظبط بعد او عند التقديم
3- لي واحد صاحبي/عمي/خالي في امريكا، ممكن يعمل لي ايه علشان يسفرني؟
* مايقدرش يعمل لك اي حاجة، ممكن تقدم على فيزا سياحة B2 وتقول انك رايح تزوره وتاخد معاك صورة الجرين كارد بتاعه او باسبوره الامريكاني. المشكلة مش في انك رايح عند مين، المشكلة مع السفارة انك تقنعهم انك راجع (ودي عايزة روابط اقتصادية واجتماعية قوية)
4- انا في العراق/سوريا/اليمن ومهدد بالموت وعايز اعمل لجؤ، اروح فين؟
* للاسف ماتقدرش تعمل لجؤ طول ما انت في بلدك اللي فيها الخطر، معنى لجؤ انك بتقول انك لو رجعت بلدك هاتموت او هاتضطهد، وطالما بتقول "لو رجعت" يبقى لازم تكون بره البلد. قدامك حل من الاتنين، اما تسافر على دولة مجاورة فيها مقر لهيئة الامم المتحدة United nations وتقدم على لجؤ refugee او تسافر امريكا باي فيزا ولما تدخل تقدم على لجؤ Asylum. غير كده مافيش حل للاسف.
5- انا زهقان من البلد/ظروفي صعبة، وعايز اهاجر امريكا، اهاجر ازاي؟
* علشان تقيم شرعي بامريكا اما 1. عن طريق لم الشمل، او 2. عن طريق عقد عمل لو انت خبرة جامدة في مجال نادر او 3. عن طريق اللجؤ (راجع النقطة السابقة) 4. عن طريق الهجرة العشوائية. غير كده يكاد يكون مافيش طرق تانية للهجرة الشرعية (ما عدا استثناءات معينة لناس معينة، زي مثلا لو مترجم كان شغال في العراق مع الجيش الامريكي)
6- ايه اسهل فيزا لامريكا؟
* اسهل فيزا هي اللي انت فعلا مسافر علشانها. وحتى دي سهلة نسبياً. لو كانت فيه فيزا سهلة، كان زمان الشعب كله هاجر من زمان
7- انا مستعد اخدم في الجيش الامريكي، لو بعت لهم، ممكن يدوني اقامة علشان اروح اخدم؟
* لأ، من الشروط انك تخدم في الجيش الامريكي انك اصلا تكون معاك اقامة او جنسية، الا اذا كان الجيش الامريكي هو اللي في بلدك (زي العراق مثلا، وانت عرفت توصلهم ووافقوا انك تساعدهم)
8- هو انا لو ولدت ابني في امريكا هاخد انا الجنسية؟
* لأ، ولا حتى اقامة. هو هاياخد الجنسية فورا وانت مش هاتاخدي اي حاجة، ممكن يعمل لك لم شمل لم يتم 21 سنة من امريكا ساعتها.
9- انا لو جت لي الهجرة العشوائية، البلد هاتوفر لي سكن وعمل؟
* لأ، هاتديلك تأشيرة وانت عليك انك تشتغل وتوفر لنفسك حياة كريمة. .
10- انا ماعرفش حد في امريكا، لو فزت اكتب عنوان مين في الاستمارة؟
* سيبك من الاستمارة، اسأل نفسك، لو فزت، هاخرج من المطار هاروح فين؟ لازم تكون عارف هاتروح فين بالظبط، دي مش مجرد خانة بتملاها وتضحك بيها عليهم. ممكن حد يساعدك تأجر شقة او سكن مشترك، بس لازم تتواصل مع حد هناك وتشوف هاتعمل ايه لما تخرج من المطار، وهو ده العنوان اللي تكتبه.
اقرأ أيضا الموضوعات التالية عن طريق الضغط على أي موضوع تريده
لد كل القدارت الكافية بالنسبة الي الشقة في بروكلين لدي اشخاص واصحاب بنعرغهم وشكر
إرسال ردحذف