طبعا كلنا عارفين الكلية اللي كانوا بيقولولها كلية اللغات والترجمة..
الكلية اللي موجودة فى جامعتين عين شمس والمنيا
لكن فتحت فى كذا جامعة تانية
وبتقبل من علمي علوم أو رياضة أوأدبي ...
الكلية الي من غيرها مكنش هيبقي عندنا مترجمين بالكم ده في لغات كتير ...
ايوة بالظبط هيا "كليه ألسن"
الكليه دي هدفها الاساسي هو الترجمة يعني مش زي آداب .. مش مجرد بتدرس لغة بتعمق وخلاص .
يعني الجزء العملي فيها اكتر ومناهجها متطورة اكتر و متماشية مع متطلبات السوق في مجال اللغة .. هتعجبك جدا يعني ..
معلومات عن كلية الألسن
الكلية اربع سنين
اقسامها ايه بقي..
بص يا سيدي ..عندك..
اول قسم قسم عربي وده بيتقسم لجزئين
جزء للعرب اللي اصلا بيتكلموا عربي
وجزء للأجانب اللي لسه بيتعلموا عربي وبيدرسوا ازاي يتقنوا اللغه ومتبقاش مكسره عندهم
تاني قسم وهو انجليزي ..غني عن التعريف بس يلا مش مشكله.. ده هتدرس فيه اكيد انجليزي .. اه سبحان الله يعني مش محتاجة اهو ..
بعد كده قسم فرنساوي .. نفس الكلام يا باشا مفيش جديد
وعندك بعد كده قسم ايطالي والماني واسباني
وفيه قسم اللغات السُلافية .. ال ايه؟ استني انا هفهمك ده عباره عن شعبتين
شعبة الروسي و الشعبة التشيكية
تامن قسم قسم الصيني
وفيه كمان قسم اللغات الأفريقية ودي برضه بتتقسم لحاجتين:
اللغة السواحيلية ولغة الهوسا
وفيه قسم اللغات السامية اللي هي العبرية
وقسم اللغات الشرقية الإسلامية الي هو فارسي وتركي
واخر قسمين قسم الياباني .
وقسم الكوري .
والاقسام ديه كلها هتلاقيها في السن عين شمس .. بس ألسن المنيا مش هتلاقي فيها غير انجليزي والماني وايطالي واسباني وفرنساوي وصيني
والاقسام دي كلها في منها الصعب والسهل ..والي اكيد ان الصعب عند حد سهل عند غيره .. فالموضوع نسبي جدا .. وبيختلف من قدرات شخص للتاني .. فما علينا من حكاية سهل وصعب ديه وخلينا نقول ان الاغلب والمتفق عليه ان قسم الكورى واليابانى هما الاحسن كمنهج تعليمي وكنظام ومبيخلوش حد مصري يدخل في نظام القسمين دول.. وهما بردو اعلى اقسام من ناحيه التنسيق الداخلي..
وبعدهم هتلاقي قسم انجليزي وروسي ودول اقسام حلوة برده .. وصيني هتلاقي معاك في الجامعه طلبه صينين فهتمارس اللغه معاهم وتحس كأنك في الصين .. فديه ميزه حلوة في القسم ده وتتضاف لصالحه.. وممكن يعني قسم انجليزي هو الي تلاقي مثلا الطلبة بتعوه بيتعبوا فيه شويه
وعشان متهوش في حكايه التنسيق الداخلي ديه .. فالتنسيق الداخلي هو التنسيق الي الكلية بتحدده لكل قسم
بمعني انك بعد ما خلاص تنسيقك في ثانوي بيدخلك السن .. بعدها علي طول اول ما بتدخل
الكلية بتبقي عامله تنسيق تاني داخلي عشان على اساسه تحدد الناس الي هيدخلوا كل قسم .. فانت بتكتب رغباتك وانت عايزه تدخل قسم ايه
والكلية بتختار القسم الي يناسب مجموعك
التنسيق الداخلي لكلية الألسن
طيب نيجي بقي للتنسيق الداخلي بالتفصيل .. وايه الشروط عشان تتقبل في اي قسم ..
وخلينا نتفق ان الشروط الي هنقولها ديه بتتغير من سنة للتانية يعني ممكن تزيد او تقل درجه..
وعموما وقبل اواول ما تقدم في الكلية هتلاقي الكلية بتعلن عن شروط كل قسم
فنبدأ بقسم فرنساوي وبيقبل اللي واخدين الفرنساوي كلغة أولى من غير اي حد أدنى في دراجاتهم في مواد اللغات في ثانوي، وبرضه بيقبل اللي واخدينه كلغة تانيه وكانوا في مدارس لغات بشرط انه يكون معاهم شهادة بتثبت انهم كانوا بيدرسوه من ابتدائي
اما قسم إيطالي فبيقبل اللي واخدينه كلغة تانية من غير اي حد أدنى، وبرضه بيقبل اللي واخدين الفرنساوي كلغة تانية بس علي الاقل يكونوا مش جايبين فيه اقل من 40 درجة
الأسباني يا سيدي بقي بيقبل اللي واخدينه كلغة تانية من غير حد أدنى واللي واخدين الفرنساوي كلغة تانية بس ميكونوش جايبن اقل من ٣٩ فيه
وقسم الألماني بياخد اللي درسوه كلغة تانية بس يكونوا جايبين علي الاقل فيه 39 .. اوالي درسوه كلغه اولي .. ولو كان فيه ناس كتير متقدمين للقسم ده فبيفضلوا طبعا الي واخدينه كلغه اولي وبعدين الي جاييبين اعلي درجات فيه كلغه تانيه في ثانوي
وقسم اللغات السلافية .. فالشعبة الروسية بتقبل بس الي كانوا واخدين الانجليزي لغة اولى وجايبين فيه على الاقل ٤٦ .. بس في المقابل شعبة لغة تشيكية فميهاش الشرط ده
نيجي لقسم اللغات السامية (الي هو العبري يعني) وقسم اللغات الشرقية الإسلامية شعبة التركي ودول شرط فيهم ان الي يدخلهم يكون دارس انجليزي كلغة اولى ومش جايب فيها اقل من ٤٢.٥.. بس الشرط ده مثلا مش هتلاقي موجود في شعبة الفارسي الي في قسم لغات شرقية
وقسم عربي هتلاقيه لطيف جدا وملوش اي شروط عشان تدخله
اما قسم الكوري بقي فبيقبل اللي درسوا انجليزي كلغة أولى وجايبين على الاقل 49 فيها
وقسم الياباني بيقبل برده اللي واخدين الانجليزي كلغة أولى وجايبين علي الاقل 49,5 ، وممكن يقبل برضه اللي جايبين 49 فى الإنجليزي عادي بس ده بيقي علي حسب مجموعك الكلي برده
وقسم الصيني بيقبل برده اللي دارسين انجليزي كلغة أولى ومش جايبين اقل من ٤٦.٥
وعندك قسم انجليزي الي لازم تكون جايب 47 علي الاقل فى الانجليزي بتاع ثانوية عامة كلغة أولى
وملحوظه مهمه بالنسبه لقسم انجليزي وصيني .. فالتنسيق الداخلي بتاعهم السنه ديه ممكن يزيد كام درجه .. لانه بقاله كام سنه بيعلي عن السنة الي قبلها .. وعموما برده زي ما قلنا ان الدرجات والشروط بتتغير من سنة للتانية .. فانت تابع كويس وانت بتقدم .. وروح اسأل في الكلية او اتصل بيهم وهيقولولك علي كل التفاصيل
وعموما مش معني ان قسم بياخد اعلي من التاني .. فمعني كده انه احسن او اوحش .. هو الموضوع بيبقي على حسب درجه استيعاب القسم ومحتاجين فيه عدد اد ايه
تنسيق كلية الألسن
وطبعا بعد الرغي ده زمانك بتسأل طب ايه هو المجموع تنسيق السن اصلا؟ فبص هو بالنسبة لعلمي علوم وادبي بيبقى حوالي ٩٤٪ وعلمي رياضة حوالي ٩١.٧٪
الكلام ده اكيد بيتغير من سنه للتانيه ومن دفعه لدفعه بس ده كان متوسط السنين الي فاتوا
خلاص كده دخلنا الكلية واستقرانا فيها .. تعالوا نتكلم بقي الدنيا ماشية ازي فيها
فاولا انت بتختار لغتتين للدراسة .. لغه اساسية ولغه فرعية و معاهم العربي كلغة تالتة اساسية بتاخدها طبيعي ايا كان اللغتين التانين الي هتختارهم وانت بكتب الرغبات من اول ما تدخل
اللغة الاولي الي هيا الاساسية الي بتختارها.. بتدرسها بعمق و الهدف انك تتخرج وانت متققنها تماما وتأهلك للهدف الرئيسي من الكلية وهو انك تكون مترجم محترف فيها..
وبتدرس مبادأها الاساسية كلغة ..و بتدرس الترجمة بكل انواعها (سياسي، اقتصادي، تجاري.. الي اخره) وبتدرس ادب ونصوص واي حاجه ليها علاقة باللغة وثقافة اللغة والبلد اللي بتتكلمها
وبتاخد فيها مواد زي قصة وحضارة ودراما واستماع ومحادثه وماده قواعد.. ونصوص وترجمه لعربي وترجمه من عربي
اللغة التانية الفرعية فبتاخد نفس المواد بتاعت اللغه الاولي بس بكمية اقل فيها وفترة اقل.. يعني بتاخد محاضره واحده فيها في الاسبوع غالبا وبتاخد فيهم شويه vocabulary و grammar
واللغة العربية بتدرس كل سنة فيها منهج مختلف يعني بتدرس ادب ومقال ونصوص ونحو وهكذا يعني ..
مجالات العمل لكلية الألسن
والاهم بالنسبالكم من كل ده هيا مجالات الشغل
فعندك ما شاء الله المجال مفتوح وعندك اكتر من حاجة .. الي اولهم طبعا وعلي رأسهم وهو مترجم في اللغة الي انت متنقنها .. سواء ترجمة فورية او تحريرية في مكاتب الترجمه ..
واكييد قدامك شركات السياحة ومجال انك تكون مرشد سياحي سواء تبع شركه او غيره ..
وعندك المدراس عموما والمدراس الانترناشونال بالذات .. وشركات الكول سنتر ..
واي شركه عموما سواء حكوميه او خاصه وايا كان مجالها ايه ..فعمر ما حاجه فيهم هتقول لأ.. لواحد معاه لغة ومتقنها كويس جدا ..
الشغل كتير عموما .. والسن من الكليات الي مفيهاش بطالة .. بس الي يتخرج منها يبقي ذكي ويسعى ويدور .. وميضيعش سنين الكلية كده وخلاص .. لأ يتقن كويس اوي الي بيدرسه ويبقي فاهم اللغه الي بيدرسها وممارسها ويشتغل علي نفسه وياخد كورسات ويطور من نفسه .. ويتفرج علي افلام كتير ومسلسلات باللغه الي بيدرسها .. ويتكلم مع ناس من اهل البلد ديه.. يعني من الاخر ميبقاش معتمد بس علي الكلية وعلي الكلام الي بيدرسه .. وميبقاش بيدرس المواد عشان يدخل يجيب تقدير او يعدي .. وبعدها يبقي كده خلص من المنهج الي كان بيدرسه .. فلو ديه نيتك من الاول فاسمع مني وبلاش تحاول تدخل الكليه عشان هتضيع نفسك ..
وبلاش الله يكرمكم .. فكره انهي قسم احسن من التاني في الشغل والدراسة لان كله تعب .. والشغل ده رزق واجتهاد منك .. بس عموما عشان تستريح فانجليزي والماني فرصهم اكتر شويه للشغل ..
وعبري كويس للولاد عشان ممكن يشتغلوا بيه في الجيش بس شغلها مش كتير اوي للبنات
اخر حاجه ممكن اقولها.. الكلية دراستها ممتعة جداً للي بيحب اللغات ودايس فيها .. والكلية مش صعبة وادبية تماما بس مش كلها حفظ بتعتمد كمان علي الفهم والحضور الكتير عشان اعمال السنة .. يعني مش معتمده علي الصم وبس ..
ولو مش بتحب المجال الادبي و الثقافي فهي مش بتاعتك و متقلقش هيا ملهاش اي علاقة بالرياضة مثلا اوالمواد العلمية
فمن الاخر لو انت صاحب خيال وحابب تتعرف علي ثقافة جديدة بشكل متعمق فصدقني السن هي مكانك..
ربنا يوفقكو ويكتبلوكوا الخير في كل الي جاي في حياتكم