"كلية الطب البيطري"
-اللي مفيش حد بيعرف قيمتها كويس غير مثلًا اللي مربي قطة أو كلب أو أي حيوانات🐻🐴، و مبيبقاش عندنا وعي ولا مدركين أهمية كلية ومجال زي ده 😮، يمكن عشان التنسيق والوضع كله حوالينا ثبّت عندنا المفهوم ده😔 ، أو يمكن عشان مش عندنا المعلومات الكفايه عن الكلية ديه وماشين بس مع كلمة بتجبنا وكلمة بتودينا...😵
-فعشان كدة اقرأوا المقال لحد الآخر وأكيد هتغيروا الفكرة دي خالص ، وهتعرفوا قد إيه الموضوع كبير وإن الكلية مجال شغلها واسع ومطلوب ، وأنها ف بلاد كتير غربية وعربية هي الكلية الأولي قبل حتي الطب البشري وده لأن الطب البيطري طب وقائي رقابي علاجي .. وهو خط الدفاع الأول عن صحة الإنسان (غير دوره طبعا ف تحسين صحة الحيوان ) لأنه بيمنع انتقال أكتر من 200 مرض مشترك من الحيوان للإنسان واللي ممكن تسبب الوفاة . 😔
-مبدأيا كدة الكلية عبارة عن 5 سنين .
مواد كلية الطب البيطري
بتكون زي أي كلية علمية أو طبية بيدرسوا في أول سنة تشريح وفسيولوجي وهستولوجي وكمياء حيوية وبيولوجي ووراثة وسلوك حيوان .
-والتشريح في أولي مثلًا بيكون تشريح عضم ومن أول سنة تانية بنبدأ نشرح الجسم كله organsو brain .
-سنة تانية وتالتة بنكمل المواد الأكاديمية (باقي الهستولوجي والفسيولوجي والكمياء ) و التغذية والتربية والإنتاج الحيواني ، تربية وإنتاج الأسماك🐟 ، والفارما والبكتيريا والدواجن ... الخ .
-أما بقى ياسيدي من سنة رابعة هتبدأ الشغل الجد الممتع 😍و هو بيبقي طب شرعي وباطنة وجراحة وتوليد وإنتاج ألبان والرقابة الصحية ع اللحوم وهكذا .
-والكلية طبعًا بيكون فيها عملي كتير مش كله نظري وبعدين ابسط ياعم سنة أولي كلها بتكون في المشرحة يعني مفيش تعامل حقيقي مع الحيوان وهو حي، يعني علي الأقل هتعدي سنة أولي من غير ماتتخض أو حتى هتكون بدأت تتعود .
مجالات عمل كلية الطب البيطري
الشغل مش مقتصر بس علي التشخيص وشغل الدكتورالبيطري اللي عارفينه ده ، لا مجالات شغل الطبيب البيطري كتييييرة جدا حدث ولا حرج 😁 الطبيب البيطري بتاع كله من الآخر (هو طبيب بشري وأسنان وصيدلة ف شخص واحد ) شخص واحد بيشخص ويحدد ويعالج ويوصف الدوا ويوفره ويحس بكائن حي خلقه ربنا بيحس وبيتألم ولكنه لا يستطيع وصف ما يشعر به وهنا يتجلي دور طبيب الإنسانية 😍.
-إنت ممكن تفتح صيدلية بيطرية و يكون مشروع حلو جدًا ..
أو ممكن عمومًا تشتغل في أي صيدلية بيطري .
- مش بس كده ممكن تشتغل كمان في مزارع دواجن أو سمك أو خيل أو إنتاج حلاب أو إنتاج لحوم ، فيه كمان مزارع الجيش.
- أو عيادة بيطري سواء تفتح عياده لنفسك أو تبدأ في الأول مع حد ودي بيكون فيها التشخيص والعلاج . 😃
وممكن لو مش حابب تتعامل مع الحيوانات الكبيرة زي الحصان والبقر وكده تفتح عيادة pets بس وتتعامل مع الققط والكلاب بس🐱🐶 .
-أو قدامك كمان الشغل في المستشفيات البيطري وممكن كمان تشتغل في معمل تحليل أو تفتح معمل تحاليل بنفسك بس لازم بعد ما بتاخد دبلومة تخصص 💉.
-وعندك كمان مجال الجودة و المراقبة الغذائية ودي بتكون مشرف على المستشفيات و مدن جامعية وموانيء ومطارات وأماكن سياحية والجمارك والمطاعم والمصانع .
-أو ممكن تشتغل في صناعة الادوية أو تجارتها وكده أو في شركات أدويه عمومًا أو ال (medical rip ) اللي هي دعاية للأدوية يعني وده كويس جدًا .
-أو سهل إنك تعمل أي مشروع مع أصحابك لتربية حيوانات، ده غير مديريات الزراعة والوحدات الييطرية والحاجات ديه .
-وبالنسبة للخمسة الأوائل فممكن تتعينوا في الكلية أو معهد البحوث أو تتعين في وحدات بيطرية.
-وبالنسبة للتخصصات والأقسام :
فعمومًا الكلية مبتتخصصش فيها غير لو هتعمل ماجستير و دكتوراه ، فبتاخد تخصص معين وبتحضّر فيه دراستك .
-غير كده مفيش غير جامعة بنها هيا الي بيكون فيها قسمين : يا قسم فارما يعني أدويه وكده , أو فود كونترول اللي هو جودة ومراقبة أغذية , وبتختار من أول سنة وقبل ما تدخل هتاخد أنهي قسم عشان على أساسه بتحدد المواد اللي هتدرسها .
- كده تقريبًا عرفتوا كل حاجة عن الكلية و ياريت فكرتكم تتغير عنها وتعرفوا قد إيه هي مهمة ومجال شغلها واسع ومطلوب 😃
-وفي الأول والآخر إنت بتنقذ روح , واللي من غير الروح ديه دايرة حياتنا مش هتكمل , فخليك فخور باللي إنت بتعمله وهتدرسه كل واحد ليه دوره الي اتخلق عشانه