الهجرة إلى كندا عن طريق ترشيح المقاطعات

مبدئيا المقاطعات ليس لها الحق في أن تعطيك  تأشيرة دخول أو هجرة ولا تعطيك اقامة دائمة ولا تعمل لك جواز سفر.. 

كل من يقوم بهذه الأشياء هي الحكومة الفيدرالية الكندية.. يعني انت حتى لو مهاجر مقاطعات أو كيبيك فالذي يعطيك التأشيرة التي تدخل بها  هي كندا وليس المقاطعة والذي يعطيك الاقامة الدائمة هي كندا وتصبح إقامة دائمة في كندا وليس في المقاطعة

 والذي يعطيك  الجنسية -بعد عدد السنوات المطلوب واستيفاء باقي الشروط- هي كندا وبتبقى جنسية كندا مش جنسية المقاطعة.. 

وما هو عمل المقاطعات إذن ؟

الحكومة الفيدرالية تعطي المقاطعات حق انهم يعملوا برامج هجرة خاصة بها بحيث ان كل مقاطعة تحدد مواصفات الناس اللي عاوزاهم يهاجروا ليها.. 

ده طبعا بخلاف برامج الهجرة اللي بتديرها الحكومة الفيدرالية من الألف إلى الياء.. فتيجي مقاطعة مثلا تحدد لستة وظايف تقول أنا عاوزة ناس تشغل الوظايف دي (علشان تسد عجز موجود عندها) ..

 مقاطعة تانية تقول أنا هاشترط اللي ييجي لازم يكون له قريب أو معرفة (عشان يقدر يساعده ويدعمه ويزيد من فرص نجاحه في الهجرة ويقلل اعتماده على المساعدات الحكومية) .. 

مقاطعة تالتة تقول أنا مش هاخد حد غير اللي عنده عرض عمل أو سبق ليه الدراسة أو العمل في المقاطعة (عشان يضمن ان المهاجر ده ييجي يشتغل ويفيد اقتصاد المقاطعة من أول يوم مش يقعد بالشهور بيدور على شغل) .. مقاطعة رابعة تدي نقط كتير للي عنده أطفال (عشان عندهم مشكلة في زيادة معدل الأعمار فعاوزين يعادلوا النسبة).. وهكذا .. 

وساعات حتى المقاطعات بتدي الحق لبعض المدن انها تعمل برامج هجرة خاصة بيها (تطبيق عملي لمبدأ اللامركزية .. لأن كل مكان أدرى باحتياجاته)

المقاطعات بتعمل البرامج دي حسب احتياجاتها وترتيب أولويتها وبتستقبل طلبات الراغبين في الهجرة وتدرسها وتختار اللي بتتوفر فيهم الشروط وتعمل لهم ترشيح "Provincial Nomination" ..

 الترشيح ده كان بيتم زمان بشكل ورقي.. يعني تبعت للمهاجر شهادة الترشيح ..المهاجر ياخد الشهادة يروح يفتح ملف جديد عند الحكومة الفيدرالية.. دلوقتي فيه بعض برامج المقاطعات متوافقة مع نظام الاكسبريس انتري بيبعتوا الترشيح ده على النظام الخاص بالاكسبريس انتري على طول وبالتالي بيديك ال600 نقطة بتوع الترشيح وبالتالي بيجيلك Invitation انك تقدم وتستكمل الإجراءات مع إدارة الهجرة بتاعة الحكومة الفيدرالية وبعضها ما زال على قديمه (ورقي) .. يعني في الحالتين الموضوع في الآخر بيصب عند الحكومة الفيدرالية اللي بتقوم بدورها بدراسة أوراقك مرة تانية وبتطلب منك حاجتين ما بيتطلبوش غالبا في معظم برامج المقاطعات وهما: الكشف الطبي والكشف الجنائي (الفيش والتشبيه) وبعد استيفاء كل الاجراءات دي بتقوم مديالك التأشيرة.. اللي بتقدر تدخل بيها كندا كمهاجر وبمجرد ما بتدخل البلد من أي منفذ بري أو جوي بتعمل اجراءات اللاندينج اللي بيها بتبقى مقيم دائم Permanent Resident رسمي.. ودي برضه اجراءات فيدرالية تقدر تعملها في أي مطار بغض النظر عن برنامج الهجرة اللي انت جي عليه.. 

طيب كيبيك؟ نفس النظام تقريبا .. اجرائيا كل حاجة بالظبط زي المقاطعات .. الفروق هي فروق شكلية.. الفرق الأول.. ان الحكومة الكندية مدية الحق لكيبيك انها تحدد احتياجاتها من المهاجرين (كما وكيفا) بعكس المقاطعات اللي بيتم تحديد الأعداد بالتنسيق مع الحكومة الفيدرالية .. الفرق التاني ان المقاطعات بتعمل ترشيح Nomination إنما كيبيك بتعمل اختيار Selection.. يعني نظريا الحكومة الفيدرالية مش من حقها ترفض مهاجر اختارته كيبك (إلا لو فيه مشكلة طبية أو مشكلة أمنية) إنما من حقها ترفض واحد مرشحاه مقاطعة أو ما تاخدش بالترشيح ده ..وباقول نظريا لأن عمليا ده ما بيحصلش.. بالمنطق كده ايه اللي هيخليهم يرفضوا؟ يعني عمليا ترشيح المقاطعة زيه زي شهادة الاختيار بتاعة كيبيك المسماة CSQ

نرجع مرجوعنا للسؤال الأساسي .. اللي واخد ترشيح مقاطعة ممكن يروح مقاطعة تانية؟

الموضوع ده أنا اهتميت بيه وقريت وبحثت فيه من أيام ما كنت مقدم على كيبيك لأني ماكنتش واثق اني هاكمل واعيش في كيبيك لو كنت هاجرت من خلال كيبيك.. وزي ما قلت اللي ينطبق على كيبيك يبنطبق على باقي المقاطعات

الموضوع فيه بعض التعقيد مش هينفع نقول أيوه ينفع أو لأ ما ينفعش كده ببساطة..

من ناحية.. لو انت مهاجر من خلال مقاطعة بيتطلب منك من ضمن الأوراق اللي بتقدمها في ملف الفيدرال اقرار انك "بتنوي" تعيش في المقاطعة اللي ادتك الترشيح.. الفورمة دي اسمها:

Schedule 4: Economic Classes: Provincial Nominees

وفي حالة كيبيك اسمها: 

Schedule 5: Economic Classes—Declaration of Intent to Reside in Quebec

وفي الفورمتين الصياغة واحدة وهي: 

I declare that my family members and I intend to live in the Province that nominated me. (in the province of Quebec) 

ومن ناحية تانية.. الدستور والقوانين الفيدرالية بتسمح لك وبتديلك الحق انك تتنقل بحرية تامة بين المقطاعات وتختار المكان اللي انت عاوز تعيش فيه (في النهاية هي بلد واحدة ومش محتاج أي تصريح عشان تدخل من مقاطعة للتانية ولا فيه بوابات بينها) 

طيب ده معناه إيه؟ 

معناه ان الاقرار ده بتعبر فيه عن "نية" وليس إلتزام بالإقامة في مكان معين. طيب يعني ايه النية؟ يعني نية.. يعني عزم على شئ معين.. انت لما تنوي تعمل ريجيم لازم تعمله؟  لما تنوى تبطل إدمان الفيسبوك بتبطل؟  ساعات آه وساعات لأ.. لما ما بتنفذش الشئ اللي انت نويت عليه ممكن تكون غير جاد في نيتك من الأساس وممكن تكون فعلا عندك النية الصادقة انك هتعمل شئ معين وتكون بدأت في خطوات معينة عشان تنفذ الشئ اللي انت نويت عليه ده بس بعد كده الظروف اتغيرت فما قدرتش تنفذه..

الخلاصة

الخلاصة من الكلام ده كله .. ودي قناعتي الشخصية اللي أنا شخصيا طبقتها واللي بانصح بيها أي حد بيسألني: لو انت مهاجر من خلال مقاطعة يبقى من الأحسن انك تروح على المقاطعة اللي انت آخد منها الترشيح فعلا.. وحاول تعيش فيها وتدور على شغل فيها.. حتى لو ناوي تنقل بعد كده بس على الأقل حاول تقعد لك سنة هناك أو حتى كام شهر.. لو ربنا وفقك واشتغلت واستقريت جايز الحياة تعجبك وتكمل.. طيب لو ما عجبتكش أو لو مالقيتش شغل أصلا.. ساعتها ممكن ببساطة تقول انك فعلا كنت ناوي تعيش هناك والدليل على كده انك رحت هناك وأجرت سكن والتحقت ببرامج مساعدة المهاجرين (في كل مقاطعة فيه مؤسسات بتساعد المهاجرين من خلال دورات لغة ومهارات البحث عن عمل وأحيانا برامج تدريب في شركات.. إلخ) ومشيت في خطوات المعادلة (لو وظيفتك محتاجة معادلة) ودورت على شغل وقدمت في وكالات توظيف وبعت لشركات ومع ذلك مالقتش شغل مناسب (ممكن تكون اشتغلت شغل كاجوال بس مش متناسب مع تعليمك وخبرتك) .. وبالتالي فانت في الحالة دي عندك مبرر قوي انك تسيب المقاطعة.. بعكس لو واحد من أول يوم راح على مقاطعة تانية ده هيقول ايه؟ 

طيب هتقول لمين؟ هو فيه احتمال حد يسألك؟ أنا باقول الكلام ده تحسبا لأي مساءلة قانونية من أي نوع.. ما اعرفش حد بشكل شخصي حصل معاه مشكلة بسبب الموضوع ده وان كنت قريت من فترة ان مقاطعة ساسكاتشوان اتخذت اجراءات ضد مهاجرين كانوا مفروض جايين من خلال ترشيحها بس راحوا على مقاطعات تانية (لدرجة ان بعضهم اتسحب منهم الاقامة بس أنا مش متأكد من مدى صحة ودقة الكلام ده) .. مع العلم ان دي المقاطعة الوحيدة اللي سمعت انها بتعمل كده.. على الجانب الآخر سمعت عن ناس بتبقى مهاجرة مقاطعات أو كيبيك وحتى ما بتنزلش في المقاطعة بتاعتهم أصلا.. وماحدش كلمهم لحد ما أخدوا الجنسية.. عشان كده زي ما باقول خليك وسط.. اثبت حسن نيتك وخلي معاك مستندات تثبت ده وفي نفس الوقت ما تبقاش خواف وامشي ورا اللي فيه المصلحة.. 

قائمة مواقع برنامج  ترشيح المقاطعات