من زمان واحنا بنذاكر التاريخ لما كانت بتيجى سيرة أى شخصية من الناس العظيمة دى.. زى سعد زغلول ومصطفى كامل كانت أول جملة بنسمعها
وتخّرج من كلية الحقوق أو حصل على الليسانس فى الحقوق
كلية البشوات والوزراء زمان
احنا بقى انهاردة هندخل كلية الحقوق ونقولك هتتخرج منها ازاى وهتشتغل ايه 😃
كلية الحقوق من الكليات اللى بتقدر تدخلها من
علمى علوم
وعلمي رياضه
وأدبى
والكليه طبعا فيها انتظام وانتساب
طيب ..ايه الفرق بين انتظام وانتساب ؟
ببساطة كدة ، انتظام مجموعها أعلى ومصاريفها أقل ، لكن انتساب مجموعها أقل ومصاريفها أعلى
نتكلم بقى عن لغات الدراسة في الكلية وهي 3 لغات
حقوق عربى
وحقوق انجليزى
وحقوق فرنساوى
طيب ايه شروط كل شعبة من دول ؟
حقوق عربى ملهاش شروط خالص غير ان كلية الحقوق تكون جيالك فى التنسيق سواء كانت انتظام أو انتساب
اما حقوق انجليزى ف شروطها انك تكون جايب 80% من درجة الانجليزى
ويكون مجموعك يجيب حقوق انتظام ..يعني مينفعش انتساب ؟ لا مينفعش انتساب للاسف
وشعبة انجليزي بتكون بمصروفات
طيب ..بالنسبة لشعبة فرنساوى ؟
شعبة فرنساوى دى حكاية لوحدها
أولا شروطها فى بعض جامعات انك تكون خريج مدارس لغات فرنساوى
وتكون جايب مجموع حقوق انتظام ، وكمان تعدى من امتحان معين بيتعمل فى المركز الثقافى الفرنسى
طيب ليه كل الشروط دى ؟
لو هنتكلم عن حقوق القاهرة شعبة فرنساوي فانت بتتخرج منها معاك ليسانس حقوق من جامعة القاهرة وكمان من جامعة السوربون فى فرنسا
وطول سنين الدراسة بيكون ليك ID من جامعة القاهرة وID من جامعة السوربون ومتاح ليك
وانت بتدرس او بعد الدراسة انك تسافر تكمل دبلومة فى فرنسا .
أما بالنسبة للمصروفات الخاصة بالقسم فبتدفع جزء منها لجامعة القاهرة وجزء منها لجامعة الصوربون بردو .
نتكلم بقى عن اقسام الكلية ..
كلية حقوق بتتقسم لـ7 أقسام
قسم القانون المدنى
قسم القانون الخاص
قسم القانون العام
قسم القانون الدولى العام
قسم الشريعة
قسم القانون الجنائى
قسم القانون التجارى
وكل قسم له مواد معينة ، أكيد يعني D:
بس الجديد بقى انك بتاخد مواد من كل الأقسام دى ومبتتخصصش فيها
إلا لو حابب تعمل دبلومة فى حاجة معينة بعد التخرج فبتختار موضوع معين فى قسم معين تعمل فيه الدبلومة
نيجي بقى لنظام الدراسة
الدراسة فى حقوق دراسة نظرية بحتة
مفيش أعمال سنة ، مفيش غياب وحضور ، مفيش ميد ترم .
لكن فيه بعض الدكاترة بياخدو غياب و كل دكتور وليه أسلوبه .
كمان في بعض الجامعات بيكون فيه أعمال سنة على بحث أو حاجة شبه كدة بس بتكون درجات بسيطة جدا لكن النسبة الكبيرة بتبقى على امتحان الفاينال.
المادة عموما بتكون من 20 ولو فيه أعمال سنة بتكون 3 درجات تقريبا أو 4
والامتحانات بتكون نظرية ، مفيش امتحانات شفوية خالص خلال سنين الكلية .
طيب احنا بندرس ايه بقى فى الكلية ؟
بتدرسوا فى الكلية مواد قانونية وشريعة اسلامية
واقتصاد بتعمق غير انك بتدرس تاريخ القانون ، وفلسفة القانون واجرام وقانون دولي وغيرها .
وعلى طول سنه اولى بتبقى اسهل سنه ف اللي بيدور على تقدير يركز من سنه اولى ويهتم بالحضور
وبتقعد الـ 4 سنين تاخد مواد من كل قسم وبعدين تتخرج معاك ليسانس حقوق
طيب وتفرق ايه دراسة انجليزى عن عربى ؟
فرق حقوق عربى عن حقوق انجليزى مش كبير
لأن قسم عربى بياخد نفس مواد قسم انجليزى وبالمناسبة قسم انجليزى بياخد المواد بالعربى بردو
لكن الفرق الوحيد انه بيزيد مادتين متعلقين بالقانون الأمريكى ودول بس اللى بيدرسهم بالانجليزى .
أما بالنسبة لحقوق فرنساوى فهما بياخدو حوالى 6 مواد زيادة عن قسم عربى متعلقين بالنظام الدستورى الفرنسي .
طيب ايه أحسن ؟ أدخل حقوق عربى ولا حقوق انجليزى ؟
هو مفيش حاجة أحسن وحاجة أوحش .. كل قسم بيبقى ليه أولوية فى مكان معين
يعنى ايه ؟
بالنسبة للشغل فى البنوك والشركات متعددة الجنسيات فالأولوية بتكون لخريجين حقوق انجليزى ودى تعتبر ميزة أقسام اللغات عن العربى .
لكن فيه أماكن شغل تانية بتفضل خريجين حقوق عربي
فكل واحد بيشوف هو مناسب ليه ايه أكتر وطموحه فين وعلى الأساس ده يكمل ويدخل عربى أو انجليزى أو فرنساوى .
السؤال المهم بقى بالنسبه ليكم دلوقتي ..أنا أما أتخرج هشتغل ايه ؟ وفرص الشغل متاحة ولا لا ؟
اه فرص الشغل متاحة بشكل كبير ومختلفة
أكتر شغل بنسمع عنه لخريجين حقوق هو المحاماة ..لأنه الشغل الأشهر ليهم ومحدش غيرهم بيشتغله .
بس المحاماة موضوعها مش سهل كدة بردو ..يعنى مش هتتخرج تشتغل محامى على طول
ليه طيب ؟
لأن مؤخرا بقى شرط علشان تبقى محامى وتاخد تصريح مزاولة المهنة ..
استني كدة ... يعنى ايه مزاولة المهنة دى ؟
مزاولة المهنه يعنى تروح المحكمة وتترافع والناس توكلك تدافع عنهم ده اسمه مزاولة المهنة
نرجع لكلامنا ..علشان تقدر تزاول المهنة 😃 لازم تاخد دبلومة سنة بعد الكلية و كمان تتدرب لمدة 3 سنين من تاريخ حلف اليمين
طيب ممكن أشتغل في ايه تانى غير المحاماة والمحاكم ؟
ممكن تشتغل فى الضرايب ، وفى الشركات و في البنوك
كل الأماكن دى بتحتاج خريجين حقوق
غير انك ممكن تشتغل فى الشئون القانونية فى القطاع الخاص
ووزارة الخارجية
وبالمناسبة منظمات دولية كتير بتقدم كل سنة طلب لخريجين حقوق علشان الشغل
ده طبعا غير النيابة ومجلس الدولة وهيئة قضايا الدولة
وهنا في ملحوظة مهمه للبنات وهي ان النيابة العامة مبتشغلش بنات .. لكن النيابة الادارية بتسمح ان البنات تشتغل فيها عادى
وبالنسبة لشغل النيابة لو حد مهتم بيه فلازم تكون جايب تقدير عام جيد فى الـ 4 سنين دراسة فذاكروا من الأول وكدة 🙂
وكده يكون اتكلمنا خلاص عن كلية الحقوق بنتمنى لكم التوفيق يا باشوات