كلية اعلام؟! .. اه الي بيقوللها كليه البنات التانية في مصر !:
ما علينا من جو العنصرية ده والي مش هنقدر نوصل فيه لنتيجه لصالح حد عشان الواقع ممكن يذل اي ولد يدخل في مناقشة في الموضوع ده
ممكن نقول إن كلية اعلام من اكتر الكليات الي العين عليها .. هيا من الكليات القليلة اللي في مصر ممكن تدخلها من أدبي أو علمي رياضي أو علوم .. وفي نفس الوقت تعتبر كلية من كليات القمة وشيك وبنت ناس وكل حاجه 😃
بس قبل ما ندخل في تفاصيل إعلام فيه معلومة ناس كتير متعرفهاش وهيا ان اعلام موجوده في 3 جامعات حكومية في مصر
جامعة القاهرة - وجامعة جنوب الوادي - جامعة بني سويف ده غير اعلام الازهر طبعا
يعني ليها اكتر من فرع مش فرع جامعة القاهرة بس
اعلام القاهرة وبني سويف مقسومه لاعلام عربي واعلام انجليزي
واعلام جنوب الوادي فيها اعلام عربي بس
اما الاقسام والتخصص في اعلام فهو واحد سوا لو انت اعلام عربي او انجليزي .. بيبقي عندك ٣ اقسام (قسم اذاعة وتليفزيون وقسم صحافة وقسم وعلاقات عامة واعلان) والتخصص فيهم بيبدأ من سنة تانيه
وعشان تدخل قسم اذاعه وتليفزيون او صحافه لازم تعمل انترفيو عشان تتقبل بس علاقات عامه مثلا بتدخلها عادي من غير انترڤيو .. والانترڤيو عموما مبيبقاش رخم زي ما الناس كلها بتفتكر .. كفايه عندك ثقتك بنفسك وثقافتك
وبالنسبة لاعلام جنوب الوادي ففيها التلات الاقسام دول بس زيادة عليهم فيه قسم اعلام الكتروني الي بتدرس فيه وسائل الاعلام بس الي موجوده من خلال النت زي الصحف الالكترونية مثلا .. وبمناسبه اعلام جنوب الوادي فمقر الكليه نفسه موجود في قنا
من الحاجات اللطيفة جدا الي هتلاقيها في اعلام انها من الكليات القليله الي ممكن تدخلها وتخرج منها وعمرك ما تفكر انك تاخد كورس في ولا مادة .. بس ممكن على الجانب العملي او بره الكلية فهتبقي محتاج كورسات كتير في المونتاج والفوتشوب وورش في الكتابة والتسجيل عشان تتطور من نفسك .. وكل ده هتلاقيه بسهوله حوليك وموجود بس لو دورت كويس
ومدام قلنا كده فمتخليش دماغك تروح لبعيد وتفتكر ان اعلام كيوت وسهله .. وافتكر انهم خدعوك وقالوا "اعلام كلية نظرية بالدرجه الاولي" فبالله عليك الي يقولك كده اخبطه بأي حاجه في دماغه وريحنا 😃
طيب نتكلم بجد اعلام مش كلية معقدة ودراستها هتلاقي نصها نظري بس هتلاقي في المقابل assigments كتيرة عملي تحببك في الكلية .. وهتلاقي ان الكليه الصعوبه بتاعتها بتتدرج معاك .. يعني اولي اسهل سنه وكل شويه بتصعب لحد ما توصل لليڤيل الوحش في رابعه
اول سنة بتاخد مواد عامة شوية يعني عربي وانجليزي ونبذه عن كل قسم.. بعد كده من سنة تانية بتبدأ تاخد مواد اجباري كل الاقسام بتاخدها زي بعض ومواد تانية حسب القسم الي انت فيه .. المواد المشتركة مثلا بتبقى زي رأي عام واعلام ومجتمع والمواد التانية الي حسب القسم زي نشر صحفي اوالقاء وصوتيات اوادارة اعلان وتسويق
اعلام ماشية بنظام الساعات المعتمدة
وبيبقي عندك ست مواد كل ترم كل ماده ليها تلت ساعات في الاسبوع متقسمه علي محاضرتين طول الاسبوع او محاضرة واحدة بس زي الوضع في جنوب الوادي و بني سويف
وفي اعلام القاهره انت الي بتختار المواد الي بتاخدها كل الترم من وسط المواد المتاحة ليك ومع الدكتور الي تختاره ..
اعلام من الحاجات الممتعه فيها والي اتطورت في اخر كام سنة . وهيا "التدريب" وبالذات لو انت قسم اذاعه وتليفزيون هتلاقي بيتوفرلك استوديو متكامل وبتدرس بجد اساسيات الاخراج والتصوير والمونتاج وازي تقف قدام الكاميرا وتعمل نشرة اخباراو برنامج من الالف للياء .. وقسم صحافه بيقي تدريبهم عملي في جرنال صوت الجامعة، بيطبقوا فيها كل حاجه ليها علاقه بالصحافه يعني ازي يعملوا خبر وتقرير وازي عملية النشر في اي جرنال بتحصل .. وعلاقات عامه الي ممكن نقول عليه مظلوم شويه في حكايه التدريب بس بياخدوا بردوا تدريب علي برنامج فوتشوب
واعلام بني سويف بتوفر للطلبة فيها كمان تدريب في ماسبيرو ولطلبة علاقات عامة بيقي ليهم تدريب في شركات
غالبية الناس الي خلاص بتقرر تدخل اعلام بتحتار في حاجه تانية اكبر وهيا انها تدخل عربي ولا انجليزي .. هو الموضوع بيرجع ليك انت في المقام الاول وانت حابب تدرس بانهي طريقة .. اعلام انجليزي هتطورلك لغتك اكيد .. وفيها كمان قسم genral ممكن تجمع فيه بين انك تدرس اكتر من تخصص سوا زي صحافة وعلاقات عامة مثلا سوا .. بس في المقابل اعلام انجليزي مفيهاش تدريب ومبتتوفرش فيها الامكانيات الي بتتوفر لعربي .. واكيد بيبقي التعب اكتر في الاول لو دخلت انجليزي وانت متعود طول عمرك تدرس بالعربي
وبالنسبة للمصاريف فاعلام انجليزي بتبقي حوالي 8500 وعربي مبتعديش ال300
وعشان تدخل انجليزي لازم متبقاش جايب في الانجليزي في ثانويه عامه اقل من ٤٦ ده غير ان فيه امتحان الاول بتمتحن وبيقي عليه ٥٠ درجه .. الموضوع عموما مبيبقاش صعب وغالبا بتتقبل حتي لو انت جايب اقل من ٤٦ في ثانويه عامه
من الاشاعات المغرضة الي بتتقال عن اعلام انها كليه ملهاش مستقبل وهتتخرج مش هتلاقي شغل .. فحاول الي يقولك كده تركنه على جنب .. عشان لو انت عندك شغف وحابب المجال ده هتلاقيك من اول او تاني سنة في الكليه بتتدرب في مكان او اتنين .. ولو انت شغال علي نفسك طول الاربع سنين هتبقي عملتك سي ڤي وخبره كويسه من قبل ما تتخرج
وعموما اعلام مجال الشغل فيها مفتوح ومش مرتبط بالقسم الي انت فيه او الي بتدرسه يعني ممكن تكون في قسم علاقات عامه واعلان وبتشتغل صحفي عادي وطبيعي جدا
فيه ناس كتير ممكن يكونوا بيسألوا نفسهم من اول ما بدأوا يسمعوا الحلقه "هيا كلية اعلام ديه بطلع منها اشتغل ايه بالظبط؟" .. فالسؤال ده ليه اجابات كتير منها صحفي ، مخرج ، مصور، مُعد ، مونتير
يعني قدامك جرايد وشبكات الكترونية اوتليفزيون وراديو
وممكن كمان تجمع بين الجزء النظري والعملي زي إنك تشتغل في بحوث الرأي العام مثلاً للي بتدرس اتجاهات الرأي العام لقضية معينة، او قدامك سكة الأفلام التعليمية والوثائقية
او ممكن تاخد مجال الاعلانات والماركتينج او تشتغل في جزء العلاقات العامة او قسم إدارة الأزمات لاي شركة كبيرة
من اكتر الاسئلة الي اتسئلت عن اعلام وهو التنسيق بتعها : فمبدأيا اعلام القاهرة بيتبقي اعلي حاجه في التنسيق وبعيها بني سويف وبعدها جنوب الوادي.. والتنسيق اكيد مش ثابت كل سنة بس ممكن نحطله range معين فعندك اعلام القاهرة من ادبي بتبقي حوالي ٩٦٪ وجنوب الوادي 93.3%
واعلام بني سويف من ادبي بتبقي ٩٣.٩٪
وعملي علوم 93.4%
وعلمي رياضة 88.5%
خلينا نقول الخلاصة: ان اعلام كليه مش معقدة سوا في موادها او في دراستها يعني بتقدر بسهوله قبل الفاينال والميدتيرم تلم نفسك وتجمع المواد وتخش تجيب امتياز .. وفي نفس الوقت كلية ممتعة وبتستفاد منها بالذات في جزء العملي .. ولو انت عندك شغف وحابب مجال الاعلام و اي تخصص فيه .. فالكليه ديه هتحمد ربنا كل يوم انك دخلتها .. وحتي لو دخلتها عشان تنسيقك حدفك فيها فمش هتندم كتير لانها مش هترهققك اوي وفي النص ممكن تحبها .. ولو محصلش وحبتها في تقدر جنب دراستك فيها تتطور نفسك في المجال الي بتحبه
في النهاية أكتر حابو بتميز إعلام مش إنها كلية سهل تتخرج منها بتقدير، ولا إن مجال شغلها واسع وتقدر تنجح فيه لو نميت مهاراتك ، الأهم من كل ده إن الإعلام أمانة ومسئولية عشان هو من المجالات القليلة جداً للي بتأثر على عقل الإنسان ومشاعره وسلوكه وبتأثر علينا كلنا بدرجات مختلفة فلازم تتعامل معاه على إنه رسالة وأمانة قبل ما تبصله إنه مجرد شغلانة كويسة بتديك فلوس ومركز اجتماعي لان في النهاية كل ده فاني ومش هيعيش غير العلم النافع والأثر الطيب للي بتسيبه وراك ...
اقعدوا مع نفسكوا وهاتوا ورقه وقلم وشوفوا ميولكوا وقدراتكم وشوفوا الكلية ديه هتقدملك ايه وهيا ديه الي هتلاقي نفسك فيها فعلا واتخيلوا نفسكوا بعد خمس او عشر سنين من دلوقتي عايزين تكونوا فين .. وهتلاقي ربنا بيهديهك للي فيه خير ليك