جميع المعلومات التي تحتاجونها لإتمام طلب الهجرة

متل ما بتعرفوا كترانة دعايات مكاتب تقديم الطلبات على الهجرة والأشخاص الي بيدعوا آنه عندهم القدرة يوصلوكم ع كندا أو أميركا أو أستراليا مقابل مبلغ مالي، هاد البوست مخصص للتحذير من عمليات النصب والإحتيال الي ممكن تتم عن طريق هاد النوع من الخدمات، لذلك قبل ما تاخدو قراركم بهالخصوص، حطوا ببالكم هالكم نقطة:

١. الحكومة الكندية (والمفروض باقي الحكومات ينطبق عليها نفس الكلام) ما بتتعامل مع مكاتب ولا مع سماسرة، ومافي أي جهة أو شخص عندهم القدرة أنه يأثرو ع قرارات الحكومة فيما يتعلق بموضوع الهجرة.

٢. المواقع الحكومية الرسمية مو المفروض تطلب مصاري، ولا المفروض تنتهي باللاحقة .com.

٣. مستشارين الهجرة شغلتهم يفهموكم طريقة سير المعاملة ويقدموا عنكم المعاملة (الي بإمكانكم لحالكم تقدموها إذا بدكم)، ولكن خبرتهم واطلاعهم على قوانين الهجرة بيخليهم قادرين أكتر من الشخص العادي على تقديم معاملة متكاملة، ولكن بالنسبة للحكومة سواء أنت قدمت أو مستشار هجرة مافي فرق.

٤. مستشارين الهجرة ليسوا محامين، هدول اختصاصين مختلفين.

٥. جميع المعلومات الي بتحتاجوها لإتمام طلب هجرة أو لجوء، المفروض يكون موجود على موقع الحكومة الرسمي, بالنسبة لكندا، هاد الرابط الي بتقدروا تلاقوا عليه كافة المعلومات إذا كنتوا من الناطقين بالإنجليزية أو الفرنسية..

https://www.cal

ولمعلومات آكتر عن موضوع طلبات اللجوء والكفالة الخاصة وغيرها بإمكانكم الإطلاع على المعلومات "الموثوقة" الموجودة عهالرابط:

https://united-church.ca/social-action/justice-i

٦. في محامين متخصصين بمجال الهجرة، هدول فيهم يساعدوكم بحال كنتوا عم تقدموا على هجرة ك Skilled Worker، وطبعاً فيكم تقدموا لوحدكم كمان إذا بتحبوا، وقبل ما تدفعوا مصاري لمحامي تأكدوا أنه محامي وعنده مكتب في كندا.

احذروا من النصب والإحتيال واستغلال حاجتكم للهجرة من قبل ضعاف النفوس، وتأكدوا قبل كلشي من الموقع الحكومي الي حتماً وبكل تأكيد موجودة عليه كل المعلومات الي ممكن تحتاجوها.