لو داخل أولى جامعة وخايف يتحفل عليك اتبع الآتي:
1-البس أي طقم قديم عندك مش لازم طقم جديد وبلاش اكسسورات كتير وكده كفاية الساعة..علشان هم هيعرفوك بشخللتك.
2-خش الكلية بثقة كده وكأنك ساقط 4 مرات اوع تبص يمين وشمال واوعاك تتصور.. اوع دي بالذات أكتر حاجة بتعرفهم إنك سنة أولى..
3-متطلعش تدور فين مدرج كذا، بص متسألش عن حاجة امشي لوحدك كده حاول تتعرف على الكلية.. واخلع نضارة الشمس مبتتلبس جوه الكلية دي .
4-مفيش محاضرات أول أسبوع متسألش عن محاضراتنا هتبدأ امتي.. وإياك تتصور إياك.
5-أول يوم كده روح أي مطعم هات فول وفلافل متجبش باتيه وبيبسي.. هيعرفوك.. متجبش باتيه وبيبسي ..
6-خودلك أسبوع على الوضع ده هتبقى برنس وفلة وهتفهم الدنيا
(نصائح مهمة للي داخلين أولى جامعة)
نصائح للطالبات
1- مفيش حد عاوز يساعدِك، كلهم عاوزين يعملوا علاقات معاكي بالكدب بتاعهم ،بالذات اي حد لابس اير بود
2- لو حد سألك "انتي سنة اولى صح؟؟" قوليلو لا سنة تالتة خير في حاجة؟ وكشّري جامد
3- متصدقيش حد يبدأ كلامه ب "انتي زي أختي" عشان ده صايع وعاوز يضحك عليكي برضو
4- ملكيش دعوة ببتوع الاتحاد والأسر والجو ده، مفيش أسرة نور الحق في الكلية لأ، ومش هتستفيدي على قد ما هتتأذي
هتقوليلي ازاي بس انا اعرف ناس في اتح......
=قبل ما تكملي، دول إبرة في كوم قش، ف متخاطريش عشان صدقيني هتتأذي جداً وهتتفتني
5- متصاحبوش ناس بالصدفة، ولا تصاحبو اول حد تقعدو جنبه في البنش، ولا تدو ارقامكم لحد لمجرد انه معاكم في السكشن، اتعرفو ع الكل بس متصاحبوش حد بالصدفة
6- ربنا اللي كان في ثانوي هو ربنا اللي ف الجامعة هو ربنا اللي ف البلد بتاعتك، ف مفيش داعي تغيري ستايل لبسك للأسوأ ولا تتأثري باللي هتشوفيه "الجامعة مليئة بالهئ والمئ ف ناخد بالنا"
7- هتلاقي بنات معاكي كل كلامهم عن الولاد وعن فلان وتسريحة علان وعربية ترتان واوميقاد الواد ده جامد، دول بقا اوعي تقعدي معاهم ولا تديهم رقمك، اوعي يا نوسة اوعيييي
8- مع بداية الكلية الناس من حواليكم هتتغير، وهتقابلوهم بعدها مش هتعرفوهم، والشاطر اللي بيفضل ثابت ويتغير بس للأحسن وميتأثرش بالقرف من حواليه، ف خدو بالكم كويس واتلمو ع ناس كويسة تعينكم مش تكون عون عليكم
9- لا ترتبطي، ولا تفكري في الارتباط، وسيبي كل حاجة لوقتها، انتي لسه قدامك بدري متستعجليش
إضافة من تعليق
بلاش تروحي بميك اب اوڤر ورموش وخلخال وضوافر صناعيه وكعب عالي🙂
نصائح للطلاب
1- متتكلمش بصوت عالي وتشتم بصوت عالي، أو تنده ع صاحبك اللي ف اخر الجامعة باسمه ع الفيس او تمليه رقمك من على بعد، يعني بص مش ناقصة عته، الحركات دي انتهت من 2005
2- ملكش دعوة ببنات الناس، لا تتعرضلهم بنظرة ولا بكلمة ولا بخفة دم ولا بتقل دم .. اتقِ الله عشان ربنا يسترها معاك
3- معاك ولاد في الكلية ممكن تسألهم عادي مش لازم نهى وعلا وأسماء
4- متدخلش الجامعة ساخن وعاوز ترتبط بدي وتكلم دي وتمشي مع دي، لأن أول حاجة هتضيع وقتك، تاني حاجة هتضيع فلوسك، تالت حاجة ده حرام ولو فرضنا حبيت بنت بجد هتكسر قلبك بايدك لو حاولت تعمل حاجة مش حلال
م الآخر بيعة خسرانة، ف ضيع فلوسك ووقتك على نفسك احسن واعرف أماكن المطاعم من اول يوم
5- حاول تفهم ان كليتك في كليتك بس، يعني مش لازم تبقى في حقوق وبتحضر في آداب وتجارة وتربية وصيدلة وعلوم وطب وهندسة
6- هستسمحك متحلقش زي بتوع التيك توك وتلبس بناطيل محزقة، حرام يا صاحبي وشكلك بيبقى وحش والله .. متزعلش مني بس دي الحقيقة
وأهم حاجة للولاد والبنات سوا
الكلية أهم مراحل حياتكم، واخطرها ! ف خدو بالكم كويس جداً
وحتة ع الهامش، نهتم بنظافتنا الشخصية يا شباب، يعني ناخد بالنا بالله عليك يا حوده عشان انت بترفع دراعك من هنا وقنابل مسيلة للدموع بتطلع من هنا، بالذات في المواصلات
ويا حبذا لو غسلت سنانك كل يوم، ياااه يبقى جزاك الله خيراً والله، حتى هتبان أجمل واشيك
والبنات بلاش الروائح ومحلات العطور اللي بنشمها دي، حرام يولاه، حرام، بالله حرام، اقسم بالله حراااااام
هاتي شبّة أو مزيل عرق ملوش ريحة كفاية، مش لازم تطلع منك ريحة حلوة، المهم ميطلعش منك ريحة وحشة، بس كده !