حاولت نشارك معاكم كل معلومة حقيقية بخصوص القرعة حاولت الامريكية 🇺🇲 و خصوصا انه لم يتبقى إلا وقت قليل و يبدا التسجيل فيها "تقريبا أسبوعين 🇺🇲
نبداو على بركة الله:
1. التسجيل كيبدا فالاسبوع الاول من شهر 10 و ينتهي في الأسبوع الاول فشهر 11. و باش تتقيد غادي يخصك الباسبور و صورة ديالك ضروري و الباك غادي تحتاجوا تقريبا شي 6 شهر من ورا ما كتربح "يعني تقدر تكون يلاه غادي تدفع/تدوز باك ليبر ولا تكون كتقراه هاد العام عادي".
2. بالنسبة للصورة، غادي تمشي لعند شي مصور بعقلوا و تقول ليه يصورك بخلفية بيضاء طبيعية و ميقيسهاش بفوطوشوب و يسيفط ليك الصورة فالإيميل و بالقياسات الأصلية ديالها "يعني ميقطع منها والوا يخليها كيفما هي من الكاميرة للبيسي للإيميل".
متكونوش لابسين تريكو ولا تجاكيطة ولا عباية ولا ولا بيضاء، يعني لبس شي حاجة تكون أي لون اخر من غير الأبيض، و ضروري و مؤكد تحيد نضاضر إيلا كنتي دايرهم، قد طبيين ولا زواق يتحيدوا "ما تتصورش بيهم".
بالنسبة للبنات متكونيش اختي لابسة لا طوانغ لا سنسلة لا بيرسينغ لا بوندو لا فيليلات ولا والوا...
و فالموقع ديال التسجيل راه كاينة ادات تما غادي تعاونكم تقطعوا التصويرة بالقياسات المطلوبة.
بالنسبة للبنات ديال الزيف، راه تقدري تدفعي بيه عادي غير هوا خاص الجبهة و الذقن يكونو باينين.
3.طريقة التسجيل من أسهل ما يكن حينت كيعطيوك 15 سؤال بالخانات فين تحط الإجابات ديالك و نتا معليك غير تعمر معلوماتك و هانتا قيدتي راسك براسك و بلاما تخرج من دارك "التحت غادي تلقاو رابط بوسط هنا فالمجموعة شرحت فيه طريقة التسجيل من ألف إلى الياء".
4. حاولوا ما أمكن ما تغلطوش/تكدبوش فالمعلومات لي كتدخلوا فالتسجيل حينت غادي تتقولبوا ملي تلقاو راسكم رابحين.
5. مكينش شي حاجة سميتها نتقيد عازب و نتا متزوج، ولا تتقيد متزوج و نتا غا مصاحب ولا خاطب، ولا تتقيدي مطلقة و نتي مزال الدعوة في المحكمة، ولا تتقيد و متدخلش ولادك ولا ولا ولا ...حينت ملي تربح غادي غير تفرح على والوا راه مكين فيزا ا معلم.
6. إيلا كنتي متزوج(ة) و بجوج بيكم عندكم الباك، راه يقدر يدفع كل واحد فيكم بوحدوا و يدير بلي متزوج "باش تكون الحظوظ مضاعفة" ولي ربح فيكم راه ديك الساعة تكملوا الإجرائات عادي.
7. مكينش شي حاجة سميتها نربح و نعطي بلاصتي لخويا عمي خالتي جدي ... القرعة مكتعطاش، ربحتي فراه ربحتي لراسك، لمراتك و ولادك مستقبلا.
8. النتائج ملي كيخرجوا فالأسبوع الاول فشهر 5 كيكونو نهائيين، يعني لقيتي راسك رابح مبروووك عليك، لقيتي راسك ما رابح ماشي موشكيل العام الجاي، ديك الهدرة ديال كيكون سحب تاني غا تخربيق.
9. دفعتي القرعة على اساس عازب و جاب الله و تزوجتي قبل ما تشوف نتيجتك فالقرعة فراه عادي، تقدر تدخل مرتك معاك فالدس-260 "غادي نشرحها" و غادي تدوزوا المقابلة بجووج بيكم و تاخدوا فيزتكم بجوج.
10. الدس-260 هي المقدم ديالك، بمعنى ملي كتربح و كيعيطوك واحد الرقم الترتيبي ديال الضوسي ديالك لي سميتوا الكيس نمبر Case Number او CN لي كيكون على هاد الشكل "2023AF0012345", فراه بهاد الكيس نمبر كتقدر تدخل للموقع ديال ملئ الدس، و تكون نتا المقدم ديال راسك، يعني كتعمر جميع المعلومات عليك، من تاريخ الازدياد تال عناوين السكن و الدراسة و السطاجات الخدمة ... يعني كتجاوب و كتعطيهم الشادة و الفادة عليك و بلا كذوب، و ركزوا على بلا كذوب حينت نهار المقابلة غادي يسولوكم على الدس-260.
11. بالنسبة فالدس-260 كتحتاج تكتب ليهم عنوان امريكي و هوا لي غادي تتوصل فيه بالغرين كارد ديالك ان شاء الله، يعني يا اما تشوف شي شخص من العائلة ولا شي صديق... و هاد العنوان عندك الحق تغيروا يا يوم المقابلة، يا فالمطار الامريكي عند الدخول، يعني مكيكونش نهائي، و هاد العنوان ماشي بضروري تمشي تسكن فيه نتا، راه غير عنوان فين يسيفطوا ليك فيه الغرين كارد.
12. القرعة الامريكية معناها ميريكان غادي تعطيك الإقامة الدائمة فقط لا غير، ماغاديش يسكنوك على حسابهم، و ماغاديش يعطيوك مانضة، و ماغاديش يتلقاو ليك فالمطار و ماغاديش يقطعوا ليك طيارة .... يعني من غير الفيزا لي كيطبعوا ليك فباسبورك فراه نتا كتخلص على راسك كلشي من الطيارة تال الاوطيل تال الماكلة ....
13.حاولوا تقراو اللغة الإنجليزية، مكتدوزوش بيها المقابلة و ماغادي تحتاجوها فوالوا هنا، ولكن تقراها عاماين قبل ما تحط رجلك فميريكان ماشي بحال تال الدقيقة 90" .
14. أهم حاجة هي خاصكم تتقربوا من الله باش تتيسر ليكم حياتكم، ماشي غير على ود القرعة ولكن على ودكم نتوما، لي مكيصليش يولي يصلي راه 5 دقايق كل صلاة و ها نتا زوين مع راسك و مع مولاك.
نقط للتوضيح بالنسبة للقرعة الأمريكية 2023 و مواعيدها:
التسجيل في القرعة الأمريكية - شهر 10/2021
معرفة النتائج - شهر 05/2022
بداية مقابلات الفائزين - من شهر 10/2022 إلى شهر 09/2023
أخطاء تمنعك من الفوز يقرعة الهجرة العشوائية إلى أمريكا Random Immigration to America
الاسئله التي تطرح في المقابلة وإجاباتها من هناااااا