معلومات عن مسابقة تعيين 30 ألف معلم

معلومات عن مسابقة تعيين 30 ألف معلم


أولا: الأولوية، الأولى، وربما الأخيرة، ستكون لخريجي كليات التربية والآداب، والإعلان الرسمي عن المسابقة التقديم للمسابقة بداية الصيف.


ثانيا: الدبلومة التربوية شرط أساسي لا تنازل عنه عند التقديم والقبول.


ثالثا: المسابقة هتكون للجميع، لمن تعاقدوا من قبل وهم الـ36 ألف معلم، ولمن تعاقدوا بالحصة، ولم تعاقدوا بالتطوع، والخريجين من التربية والآداب في التخصصات اللي هتطلبها الوزارة.


رابعا: الأولوية في التعيين هتكون لمعلمي رياض الأطفال، أولى ابتدائي، تانية ابتدائي، تالتة ابتدائي، رابعة ابتدائي، خمسة ابتدائي، والسادس الابتدائي.


خامسا: الصفوف الأولى، يعني معلمين متخصصين في العربي، الإنجليزي، العلوم، الدراسات، الرياضيات.


سادسا: الأنشطة هيكون لها نصيب في التعيينات، لأنها جزء من منظومة التعليم الجديدة بالصفوف الأولى.


سابعا: مدارس قرى حياة كريمة الجديدة، ليها نصيب كبير، لأنها بلا أي معلمين، وتم تأسيسها منذ شهور في القرى والمناطق التي يتم فيها تطبيق المشروع الرئاسي، ولم يكن فيها مدارس من قبل.


ثامنا: المسابقة مش هتكون على مستوى الجمهورية بنفس الأعداد في كل محافظة.. لأ.. دي هتكون حسب احتياج كل مادة في كل صف في كل مدرسة في كل إدارة.


تاسعا: وزارة التعليم عندها قائمة بالعجز في المعلمين في كل فصل في الـ 55 ألف مدرسة على مستوى الجمهورية، وسلمته للجهاز المركزي للتنظيم والإدارة، واعتمده رئيس الوزراء.


عاشرا: سيتم ربط التقدم للمسابقة بمحل السكن المدون في البطاقة الشخصية، يعني مش هتقدم غير على مدرسة تابعة لإدارتك التعليمية علشان محدش بعد كده يقول عايز أعمل نقل ولا ندب لمدرسة قريبة من بيتي، بشرط ألا يكون مر على استخراج البطاقة ستة أشهر على الأقل للتأكد من عدم تعديل مقر السكن حديثا.


حادي عشر: الأكبر سنا، والأعلى تقديرا والأعلى في الدرجة العلمية، فئة أولى، وبعدها يتم النزول للسن الأصغر، والتقدير والدرجة العلمية الأقل.


ثاني عشر: إجراء المسابقة بشكل إلكتروني، وغير مركزي، يعني هيكون لكل إدارة تخصصات مطلوبة غير الإدارة اللي جمبها حسب نوع العجز الموجود في مدارس كل إدارة.


ثالث عشر: بعد القبول في المسابقة، هيكون فيه تعاقد بين الخريج ووزارة التربية والتعليم لمدة عامين يكون فيها بدرجة "معلم مساعد"، وبعدها ياخد شهادة الصلاحية المهنية علشان يتثبت رسمي.. وشهادة الصلاحية المهنية دي معناها إن الخريج الي تنطبق عليه شروط المسابقة هيشتغل فترة بعقد، وخلال الفترة هيكون فيه تقييم وقياس أداء ومستوى للخريج، وبعدها يتم اختباره من أكاديمية المعلمين، ولو ظهرت كفاءته في كل التقييمات، يطلع قرار رسمي بتعيينه في الدولة.. يعني محدش هيجي من البيت على المدرسة، ده فيه تدريب وتأهيل وتقييم ومتابعة قبل الدولة ما تقولك انت بقيت جزء مننا.


رابع عشر: المسابقة مش هيكون فيها تدخل من أي عنصر بشري، وكله إلكتروني تحت عين الأجهزة الرقابية، وده تكليف رئاسي، علشان لا يبقى فيه واسطة، ولا معارف، ولا فلوسم ن تحت الترابيزة، دي مجموعة شروط بتدخل على الكمبيوتر، وهيتقدم كذا ألف، والكمبيوتر هو اللي هيقول الـ 30 ألف دول اللي تنطبق عليهم الشروط بالظبط.. يعني لو حد قالك هات فلوس وهساعدك في التعيين، ده نصاب، أيا ما كان منصبه ونفوذه.

المصدر : الصحفي أحمد حافظ 

تعليقات
تعليق واحد
إرسال تعليق



وضع القراءة :
حجم الخط
+
16
-
تباعد السطور
+
2
-