تحبو نصيحة من عندي؟ ديرو في ثقة؟ حابين تروحو لكندا 🇨🇦 عن طريق الدراسة؟ درك نفهمكم. أولا وقبل كل شيئ لا تسألوا كثيرا راها تتخلط عليكم، روحو خطوة خطوة.
هاهي الاستراتيجية لي لازمكم تبعوها :
أولا
ابحث عن جامعة تحتوي على تخصص دراستك، مثلا أنت قريت ليسانس 3 سنوات + عام ماستر بيولوجي إذن ابحث عن جامعة فيها ميتريز في البيولوجي. لازمك تلقى عدة جامعات ومن بعد تختار واحدة أو اثنين منهم (حسب إمكانياتك المادية). ولاكان قريت ليسانس 3 سنوات فقط اذن ابحث عن جامعة فيها بكالوريا في البيولوجي أو تخصص آخر قريب من البيولوجي.
🟠 في البكالوريا ماشي شرط تختار نفس البرنامج لي قريتو تقد تبدل تخصص عادي جدا. أما في الميتريز ابقا في التخصص لي قريتو
🟠 لازمك تفهم بلي لاكان عندك الباك فقط أو L1 أو L2 أو L3 أو ليسانس 3 سنوات إذن في هذه الحالة تقدر تسجل في بكالوريا
باش تسجل في الميتريز لازمك على الأقل قريت 4 سنوات في الجامعة. مثلا قريت ليسانس كلاسيك (4سنوات) تقدر تسجل في ميتريز أو قريت ليسانس 3 سنوات + ماستر 1 أو ماستر 2 تقدر تسجل في ميتريز.
ثانيا
إياك أن تذهب للحلول السهلة، مثلا انت عندك ماستر 2 وتحاول تسجل في بكالوريا أو DEP او DEC. على العكس حاول دائما تطلع فالنيفو. يعني عندك ماستر 2 سجل في ميتريز. هكا يولو عندك حظوظ أكثر تاع واح صح حاب يقرا، ماشي حاب يطلع برك لكندا
🟠 لي يسجل أدميسيون دكتورا في كندا ويعطوه الادميسيون عندو حظوظ كبيرة يدي فيزا دراسة. ثم تجي الميتريز ثم البكالوريا ثم DEC. وأقل حظ هو DEP قليل جدا وين يمدو الفيزا عليه.
ثالثا
هدفك هو تجي تقرا في كندا، لا تضيع وقتك في فهم المنظومة من الان (لابورس، جامعة رخيسة، مدينة رخيسة فيها الخدمة والكراء رخيس....) هذا كله مضيعة للوقت. بل ابحث عن الجامعة لي عندك حظوظ فيها كبيرة باش تقبلك
رابعا
اختيار الجامعة: هذه النقطة مهمة جدا جدا في حصولك على الفيزا. ابتعد عن الجامعات الكبيرة لي عليها الضغط، وكذلك ابتعد عن المدن الكبرى مثل مونتريال. لأن العالم كله يتجه نحو هذه المدن الكبرى والجامعات الكبرى وتقوى المنافسة وتقل حظوظك في الحصول على أدميسيون وحتى الفيزا. اختار جامعات لي مايروحوش بزاف ليهم الناس و في مدن صغيرة. هكذا تقل المنافسة والجامعة تجدها تشجع المهاجرين باه يجو يعمروها مثل جامعة Sainte Anne👌 أو UQAR👌 أو Laval👌.
🚫 جامعة UQTR هي جامعة مليحة ولكن ابتعدو منها لان الجزائر والمغرب وتونس كلهم يسجلو في هذه الجامعة وتصرا فيها مشاكل من بعد، راكم شفتو واش صرا في الطلبة في شهر أوت الماضي.
🟠 كاين جامعات تشترط اللغة من الأول يعني في الادميسيون لازمك تبعت الاختبار تاع اللغة. وكاين جامعات تقبلك وتعطيك الادميسيون وكي تجي للجامعة ديرلك هي اختبار لغة وكون تلقاك ناقص يزيدولك فالبروقرام كور ولا زوج تقراهم
خامسا
كي تختار الجامعة وتلقى التخصص لي حاب ديرو، اقرا الشروط وعمر الادميسيون بشوية وشوف فاليوتوب وكي تحصل اسأل.
سادسا
كي دير الأدميسيون، الجامعة تردلك في مدة من شهر إلى 3 أشهر، كل جامعة وكيفاش كاينة لي طول وكاينة لي تردلك ليه ليه.
سابعا
لكان تبعت واش هدرت في النقاط الستة الماضية رايحين يعطوك ان شاء الله الادميسيون وبعدها لازمك دير CAQ (إذاكانت الجامعة لي اخترتها خارج مقاطعة كيبك، ماديرش CAQ. مثلا جامعة Sainte Anne راها خارج مقاطعة كيبك لا تحتاج إلى CAQ)
ثامنا
دير ملف الفيزا. ولكان تبعت جميع النقاط وتبعت الصفحة والنصائح لي نقدموها راح تدي الفيزا إن شاء الله.
تاسعا
هزيت الباسبور ومعاه الفيزا، اتكل على ربي واطلع لوزارة التعليم العالي في الجزائر العاصمة وقلهم جيت ندير ملف تاع la bourse d'exemption des frais majorés. ♦️♦️♦️لابورس راني حكيت عليها بعد ماديت الفيزا يا أخي الكريم ماشي قبل ما تختار البرنامج أو الجامعة أو او... ‼️
عاشرا
هز باڤاجك، بوس والديك وخاوتك واطلب السماح منهم واطلب رضاية الوالدين واطلع لكندا.
أحدا عشر
وصلت لكندا بخير وعلى خير. الحمد لله. هنا حاب تبدل الدراسة ودير DEP؟ دير ادميسيون خارج المقاطعة لي راك فيها، وابحث عن معهد يكون في مدينة كبيرة فيها الخدمة والكراء الرخيس.... ♦️♦️♦️شفت أخي الكريم الان وين نحكيو على الكراء الرخيس والعمل و و و....ماشي قبل الادميسيون وقبل ماتجي لكندا‼️
وتقدر تبدل الجامعة وتبدل البروقرام عادي من دون أن تغير permis d'étude إذا بقيت في نفس المستوى ونفس session (مثلا تبدل ميتريز من جامعة لافال session automne 2022 إلى ميتريز في جامعة UQAR session automne 2022) ونفس المقاطعة. وكذلك إذا لم يكن permis d'étude تاعك ماشي ferme. المهم في جميع الحالات اتصل ب immigration canada واسألهم عن حالتك وهوما يعطوك الجواب الصحيح حسب الحالة لي راك فيها.
🔴 لي حب يبدل من جامعة الى معهد يقدر وبدون اللجوء إلى محامي.
🔴لازم يكون متواجد في كندا. حذاري ديرو الادميسيون في المعهد قبل ماتجيو لكندا. حذااااري
🔴والادميسيون ديروها في معهد يكون خارج المقاطعة لي فيها الجامعة لي جيتو تقراو فيها
أخي الكريم أختي الكريمة نتمنالكم التوفيق من كل قلبي وربي ينجحكم كامل. ومن فضلكم بارطاجيو المنشور ليستفيد غيركم أيضا. ماتنساوش
بدي هجرا إلي كندا أنا عندي عالية من سوريا حاليا في تركيا غارب عنتاب عرابان اشلون تسجيل إلي كندا يا أخي 00950393690901
إرسال ردحذف