الموضوع ده ناس كتير سالتني عليه ازاي نسافر ماليزيا سياحة ونروح السعودية بفيزا ترانزيت ونعمل عمره واحنا راجعين انهارده هشرح الموضوع بالتفصيل الممل ركز بقي معايا اووووي
دلوقت السعوديه عاملة تاشيرة ترانزيت مدتها من يوم الي ٤ ايام ومن فترة كبيرة الموضوع ده, بتقدر تدخل بيها السعودية وتطلعها اونلاين ب ٣٠٠ ريال سعودي مهما كانت جنسيتك وتعمل عمره كمان بس الجديد بقي انها بقت عن طريق الخطوط السعوديه يعني وانت راجع من اي بلد عن طريق الطيران السعودي تقدر تختار اختيار الراحة او الترانزيت وتقول انا عاوز انزل اريح ٤ ايام في السعوديه وبالطريقة دي هتقدر تخش وتعمل عمره
الموضوع سهل جدا بس عشان يبقي افضل ومفهوم انا هعملك برنامج يعتبر ارخص رحلة بس انا هشرحه بالتفصيل زي ماقولت فوق تقدر تربط الطيران مع اي بلد وانا اختارت ماليزيا عشان ارخص حاجه يعني هتطلع من مصر هتروح ماليزيا تقعدلك اربع ايام وانت راجع مصر علي الخطوط السعوديه هتدخل ٤ ايام السعوديه بالفيزا الترانزيت وبعدين تخلص عمرتك وتاخد طيراتك علي مصر سعر الطيران للرحلة دي هتخش تلاقيها عامله ٩ الاف جنيه بس هوريكوا مثال اهو
💢الطيران
اول حاجه هتخش علي موقع الخطوط السعودية موقع الطيران السعودي https://www.saudia.com
او تحمل برنامج الطيران علي التليفون وهتختار السفر من القاهرة الي كوالالمبور عاصمة ماليزيا وهيبقي السفر من القاهرة يوم ١٠ مايو والعودة ١٤ مايو لما بقي تيجي تختار العودة هتختار (استراحة سفر جدة ) وتختار ٤ ايام وبالطريقة دي بدل مكنت راجع مصر يوم ١٤ المده هتزيد وهتبقي يوم ١٨ زي الي الصوره بقت ١٠١ ساعة , يعني هتقعد في ماليزيا ٤ ايام وهتقعد في السعودية ٤ ايام وهتلاقي سعرها عمل ٩ الاف جنيه هتلاقوها في الصورة
💢التاشيرة
مبدأيا ماليزيا بدون تاشيرة للمصريين وانا كاتب بوست عنها بالتفصيل في الجروب
اما بالنسبة لتاشيرة السعودية الترانزيت بتعملها عن طريق موقع وزاره الخارجية وده هتلاقيه بعد ماتحجز التذكرة وتدفع فلوسها هتلاقي خانه بتقول (التقديم علي تاشيرة المرور الاليكترونية) وتكتب بياناتك وتدفع ٣٠٠ ريال سعودي وهتطلعلك التاشيرة الاليكترونية علي طول وبتكتب بيناتك بحرص ودي الي هتقدر بيها تدخل السعودية ٤ ايام
💢الاقامة
بالنسبه للفنادق في ماليزيا الفنادق رخيصة جداا انا حاطط فندق ٤ ايام يعني بحوالي ٧٠٠ جنية وهتلاقوا فنادق كتير اقل من كده كمان
اما السعودية فا بعد بحث لقيت فندق برده ٤ ايام ب حوالي ٩٧٠ جنيه والفندق بيوفر باصات للحرم كل نص ساعة ولو بحثتوا اكتر هتلاقوا انواع حسب اختياراتك
💢المصاريف
عملة الرنجيت الماليزى عاملة حوالي ٤.٢٥ جنيه مصري والاكل والموصلات هناك مش غاليه والمصاريف طبعا بترجع من شخص الي شخص تاني, اما السعوديه فكلنا عارفين تقريبا حاليا الريال عامل ٥ جنيه مصري والاكل هناك برده مش غالي وطبعا كل شخص وحسب مصاريفه
انا حاولت علي قد ماقدرت اجمع الموضوع بسهولة ده علي اساس يبقي منه رحلة لماليزيا والسعودية باقل اقل التكاليف وطبعا مع مرعاة انك تقدر تمد او تقل في المدة حسب اختياراتك والافضل يبقي جروب عشان المصاريف تبقي اقل من حيث الاقامة والطيران
طبعا لازم تنزل برنامج توكلنا واعتمرنا عشان تعمل تصريح العمره
وكمان بالنسبة للبنات السعودية لغت المحرم يعني ممكن لو بنت تطلعي لوحدك
الموضوع بسيط جداا جدا وتقدر تنظم البرنامج ده لوحدك وانا منزل شوية صوره هتسعدك تقدر تعمل برنامج زي ده لوحدك او مع اصحابك وهبقي انزل فيديو يوضح كده
اي سؤال طبعا انا جاهز اجوبك عليه وابقوا ادعولنا معاكو