بما إن أخواتنا من تالتة إعدادي الفتره دي بدأوا يسألوا أسئلة عن مدارس التكنولوجيا التطبيقية تكثر واللي منهم مدرستنا ، مدرسة WE للتكنولوجيا التطبيقية فقررت إني أجمعلكم كل الأسئلة والمعلومات اللي ممكن تحتاجوها ع شكل سؤال وجواب عشان تعرفوا تتخذوا القرار الصح.
قبل ما أبدا ، لا تقلقوا المقال مفصل ومنظم عشان تلاقوا اللي بتدوروا عليه بسهولة ، كنت بسأل زيكم السنة اللي فاتت ولحد دلوقتي بدعي لزمايلي اللي جاوبوا عليا من مختلف الفروع ولكن النهاردة الأمر مختلف أنا اللي جاية أجاوب ع أسئلة أخواتي وأولياء أمورهم وهحدثه ان شاء الله أول بأول لو ظهرت أسئلة جديدة.
1. ايه هي مدارس التكنولوجيا التطبيقية؟
- هي نوع من أنواع مدارس التعليم الفني بتعتمد على الشراكة مع أحد شركات القطاع الخاص لإعداد فني جدير متعلم ومدرب ومحترف في مجال تخصصه وبتتنوع تخصصاتها عشان تواكب الاحتياجات لسوق العمل
2. ايه هي مدرسة WE للتكنولوجيا التطبيقية ؟
- هي أول مدرسة متخصصة في مجالي الاتصالات وتكنولوجيا المعلومات وهي عبارة عن شراكة بين وزارة الاتصالات وتكنولوجيا المعلوماتMCIT وشركة المصرية للاتصالات Telecom Egypt ونظام التعليم فيها قائم على نظام الجدارات
3. يعني إيه نظام الجدارات ؟
- هو نظام للتعليم تم تطبيقه عشان نتأكد إن طالب WE يبقى فني محترف عنده العوامل الأساسية عشان يكون فني جدير متميز عن غيره ومحترف في مجال تخصصه وهي:
* المعارف النظرية
* المهارات العملية
* الأخلاقيات والمهارات الحياتية (زي مهارات التواصل الفعال والعمل في فريق وغيرهم)
4. ايه هي فروع WE ومواقعها؟
- حاليا فروع WE عبارة عن 7 فروع في سبع محافظات مختلفة وهم: الجيزة(الشيخ زايد )، القاهرة (مدينة نصر)، الاسكندرية، المنيا، المنصورة ، السويس ، والوادي الجديد وهتلاقوا قائمة بال locations بتاعت معظمهم تحت في التعليقات
ومعلومة كمان الوزارة أعلنت عملها على افتتاح 20 مدرسة جديدة خلال العام الحالي بحيث تكون في كل المحافظات
5. السؤال المتكرر وبشدة ، ايه هو أفضل فرع من فروع WE وهل الفرع ده أفضل ولا التاني؟
- للإجابة على هذا السؤال لازم تعرف حاجة مهمة جدا جدا جدا جدا وبشدة وهي : "كلنا واحد ، كلنا WE" 💙 أو بمعنى آخر كلنا بنندرج تحت منظومة تعليمية واحدة ونظام واحد ومفيش فرق بيننا كطلبة بردو وكلنا أخوات وعلى تواصل دايما بين الفروع وتعاون مستمر ، ف نصيحة مننا كلنا اختار الفرع الأقرب لبيتك ؛ لازم تبقى في المدرسة 7:30 بالظبط ومواعيدنا مظبوطة ولازم تلتزم يا فني يا محترف😁💙
6. ايه هي المواد اللي بتدرسوها؟
في سنة أولى بندرس:
* Telecommunications (Telecom)
* Information technology (IT)
* Math
* Physics
* English
* لغة عربية
* تربية دينية
* تربية وطنية
* Technical drawing
* Electrical systems
* ICT
* PE
* Life skills
بالاضافة الى التدريب الميداني بالمواقع الخاصة بشركة المصرية للاتصالات
وفي سنة تانية:
* مادة تخصص واحدة بتختارها Telecom أو IT (Networks and cybersecurity او programming /web)
* Math
* Physics
* English
* لغة عربية
* تربية دينية
* دراسات اجتماعية
* ICT
* P.E
* Life skills
* Auto Cad
وباذن الله اخواتنا في تالتة يخلصوا وهيشاركوا معاكم المواد اللي بياخدوها في سنة تالتة ، وبما اننا ذكرناهم ادعولهم بالتوفيق يلا
إلى جانب الدراسة هتلاقيهم بيطوروا من مهاراتنا المختلفة في التواصل والثقة بالنفس والاعتماد ع الذات ومهارات presentation skills وغيرها من ال soft skills وال life skills وازاي تبقى قائد قوي الشخصية وشخص مؤثر في مجتمعك ومفيد ليه وازاي تشتغل في فريق وغير النشاطات المختلفة اللي بتساعدك تبقى جدير ، وع ذكر كلمة جدير ف نقول مرة تانية عشان لو نسيت معناها ده نظام التعليم عندنا ، نظام الجدارات واللي بيعتبر من أنجح الأنظمة التعليمية وبيعتمد ع أن الطالب يكون عنده المعرفة النظرية والمهارات العملية إلى جانب الأخلاقيات والسلوكيات ومهارات التواصل
7. ايه الكليات اللي نقدر ندخلها بعد التخرج وهل يمكن دخول هندسة؟
- الكليات المسموحة لخريجي مدارس WE هي :
* كليه الهندسة بعد عمل المعادلة
* الجامعات التكنولوجية
* المعاهد الفنية
8. هل يمكن للخريج الالتحاق بسوق العمل مباشرة؟
- أكيد ممكن ، وهيبقى جدير بالعمل بمجال تخصصه بعد تخرجه مباشرة
9. ايه هي الشهادات اللي بيحصل عليها الطالب؟
- الطالب بيحصل على :
* شهادة الدبلوم الفني لمدارس التكنولوجيا التطبيقية
* شهادة أكاديمية معتمدة دوليا
* شهادة خبرة من شركة المصرية للإتصالات
* شهادات مهنية خلال فترة التدريب العملي
10. ايه هي شروط القبول بمدارس WE ؟
- بتختلف الشروط من عام لآخر ولكن بالنسبة لشروط السنة اللي فاتت 2021/2022 كانت:
* أن يكون الطالب لائق طبيا
* أن لا يزيد سن الطالب في أول أكتوبر عن 18 سنة
* أن يتمتع الطالب بالجنسية المصرية
* إجادة اللغة الانجليزية
* ألا يقل مجموع الطالب في الشهادة الاعدادية عن 250 درجة (ممكن تختلف السنة دي وممكن لا)
* اجتياز الطالب لاختبارات القبول والمقابلة الشخصية
11. ايه هي طبيعة اختبارات القبول والمقابلة الشخصية؟
- مبدأيا كدة أحب أطمنكم ، اختبارات القبول مش صعبة والأسئلة مش تعجيزية ولا حاجة ومش هيتطلب منك تحل 200 سؤال في تلت ساعة والكلام ده لا خالص الأسئلة بتبقى عن الماث والانجلش واللغة العربية واسئلة كلها في مستوى طالب تالتة اعدادي وده طبيعي وعادي جدا وخاصة انك طالب في تالتة اعدادي😂 ف هتتسأل في ايه مثلا؟! كله تراكمي ودرسته قبل كدة ف لا تقلق و مش محتاج تاخد كورس مخصوص للاختبارات ولا المقابلة الشخصية ، هتاخد كورس اه ولكن لنفسك تتعلم حاجة جديدة لنفسك أنت سواء لغة جديدة أو تجرب تتعلم برمجة أو تاخد فكرة عن التخصصات والتكنولوجيا بشكل عام ، في WE هتتعلم انه مش هدفك من التعليم هو الامتحان ولا التقديرات وبس، الامتحان ده تقييم ليك ولتحصيلك الدراسي أما إنت فلازم تحط في دماغك إنك بتتعلم لنفسك أنت وبتطور نفسك للأحسن دايما 💙
12. أنصح مين يدخل WE؟
- لو أنت بتحب التكنولوجيا عامة وتكونولوجيا المعلومات والاتصالات خاصة ونفسك تشتغل فيه وعندك معلومات عنها أو حتى لو ما تعرفش عنها خالص ولكن عاوز تعرف وعندك القابلية لأنك تتعلم وتبحث وتشتغل على نفسك وعندك استعداد تشتغل تحت ضغط وتطلع أفضل ما عندك وتطور من نفسك طول الوقت ف مدرسة WE مناسبة ليك جدا وتدخل وانت متطمن انه هيتم تشجيعك طول الوقت على الابداع والابتكار ودعم المهندسين والمدرسين والادارة دايما مستمر والتغير الايجابي في شخصيتك هيبقى ملحوظ.
لكن ملحوظة مهمة :
حتى الآن غير مسموح لخريجي WE بدخول كلية الحاسبات والمعلومات على حد علمنا حتى الآن معرفش مستقبلا ده ممكن يتغير ولا لا ولكن حتى الان مفيش حاسبات
13. هل WE أصعب من الثانوي العام؟
- سؤال زي ده مش مفروض نسأله لسببين ، السبب الأول هو إن الموضوع نسبي وبيختلف على حسب الشخص وميوله وقابليته لتعلم حاجات جديدة وقابليته للبحث والسبب التاني هو إنه اللي بيجتهد ويتعب ويعمل اللي عليه هيتفوق في أي مكان يروحه أيا كان ، ف لو ناوي تعمل اللي عليك ما تسألش سؤال زي ده ، واعرف كويس إنه "لا يكلف الله نفسا الا وسعها"
14. أنا من مدرسة عربي ،هل ده هيأثر عليا وخصوصا اني عرفت ان المواد باللغة الانجليزية؟
- عشان نبقى صادقين أنت ممكن تستغرب الموضوع او تستثقله شوية في مواد زي الرياضيات مثلا أو في مواد التخصص في الاول وبس ودي كلنا بنبقى أول مرة نشوف مصطلحاتها أصلا ولكن مع الوقت وبسرعة هتلاقيك اتعودت ومعندكش أي مشكلة زيك زي طالب المدارس اللغات وده طبعا بيبقى باجتهادك وشغلك على نفسك مع الدعم من المهندسين والمدرسين وهتلاقيهم بيبدأوا معاك واحدة واحدة لحد ما تتعود
15. مين اللي بيشرح المناهج ؟
- بما ان المناهج عندنا مستواها عالي ومميز ف أكيد لازم اللي يشرحها يكونوا مهندسين ومعلمين ودكاترة محترفين وذوي خبرة في مجالات تخصصهم وعندهم دراية باللي بيحصل في سوق العمل وتجارب حياتية، هتلاقيهم بيشرحوا باحترافية ، هدفهم الأول والأخير إنك تفهم ، مش بيزهقوا من الأسئلة بل على العكس بيحبوا الأسئلة وبيجاوبوا على أسئلتك في مجال تخصصهم وعلى حسب خبرتهم العملية حتى لو الأسئلة دي خرجت برة المنهج المهم عندهم إنك تتعلم ومش هيبخلوا عليك بمعلومة، لو تعبت هتلاقيهم أول حد جنبك وفي ظهرك بيشجعوك إنك تكمل وبيدعموك طول الوقت وبيبذلوا مجهود عظيم وجبار والبسمة ما بتروحش من على وشوشهم
دايما مهتمين بيك بيحبوك وخايفين على مصلحتك، مهما اتكلمنا مش هنوفيهم حقهم فعلا وصعب احساسنا تجاههم يتوصف بالكلام، ممكن تفتكره مجرد كلام لكن هتحس بيه كله لو مريت بيه وهتعرف إنه مش كلام وخلاص دي خلاصة تجربة حقيقية ... تجربة لا تعوض
16. بكل صراحة هل عمرك ممكن تندمي انك دخلتي WE ؟ هل لو رجع بيكي الزمن كنت دخلتي ثانوي عام أو اي مدرسة تانية؟
- ردي الصريح على سؤال زي ده : عمري في حياتي ما هندم إني دخلت WE ... أبدا !
17. امتى التقديم هيبدأ؟
- التقديم لسة لم يتم الاعلان عنه ، تابع الجروب وهنعرفك أول ما يبدأ ساعتها هتقدم على الموقع وهيبقى فيه اختبارين ومقابلة شخصية لو اجتزتهم ف مرحبا بك في WE واستعد لرحلة ممتعة ومميزة وفريدة من نوعها
ملحوظة تانية كمان على السريع :
لو وأنت بتختبر أو بتقدم ورقك وأنت في المدرسة لقيت حد مننا - طلاب WE - بيبصلك وبيقولك تعالى معايا يا "هندسة" عشان تختبر أو اتفضلي يا "باشمهندسة" المقابلة ما تبصش حواليك وتدور😂 ، احنا بنكلمك إنت/إنتِ ،ما تستغربش، هتتعود على كدة مع الوقت 😁💙
نسيت اقولك قريب اووي هنسمع خبر ان مدرسه WE موجوده في كل محافظة يعني 27 فرع يعني تم البدا في إنشاء 20 فرع غير ال 7 الموجودين حاليا
#WE_نقدر
#WE_غير_اي_حد