كلية التمريض
بفتكر دايما كلمه اتقالتلي في يوم من الايام
"مهنة التمريض من أرقي المهن علي وجه الأرض .. كفايه عليك وانت بتشوف ابتسامه على وش المريض لما بتتخفف عنه الالم او بتساعده وبتنقذ حياته"
"كلية تمريض" .. كلية مهضوم حقها وسط الكليات كلها .. ودايما المقارنه بينها وبين طب عمرها ما بتبقي منصفه .. مع اننا لو حسبنا الامور بشكل صح .. بعيد عن الي اتربنا عليه والي المجموع والتنسيق فرضه.. فهتلاقي ان كلية زي دية من غيرها منسواش حاجه .. ولا حتى اي دكتور هيعرف يكمل شغله
مبدأيا كده كلية تمريض موجودة في معظم المحافطات تقريبا زي (القاهرة واسكندرية وطنطا والمنصورة وعين شمس و اسيوط والمنيا وبني سويف وسوهاج والفيوم … وغيره)
ونظام الكلية بيتخلف من جامعة للتانيه يعني عندك جامعة المنصورة وكفر الشيخ واسكندرية ماشين بنظام الساعات المعتمده والي اكيد ليه مميزاته وعيوبه .. وفيه كليات تانيه ماشيه زي اي كلام من غير النظام ده
وفي التنسيق غالبا كلية تمريض بتكون فوق ال90% لطلبة علمي علوم بس اكييد .. وفي التنسيق بيبقي بعد بيطري وقبل علوم .. وغالبا بتبقي مرحلة تانيه
واكيد مش محتاجين نوضح ان الكلية للولاد و البنات .. مش الفكره الي عند نصنا انها للبنات بس D:
الكلية خمس سنين .. ٤ سنين دراسه وسنه امتياز
واغلبها بتبقي عمليه .. يعني مطلوب منك حضور كل يوم .. وبتنزل المستشفي وبتشوف حالات وبتتعامل معاها
طيب .. كلية تمريض المواد فيها بتتقسم قسمين : مواد تمريض (يعني في صميم المجال) و مواد غير تمريض (يعني المواد الي معظم الكليات الطبيه بتاخدها)
يعني فمواد تمريض في مادة اسمها أساسيات تمريض معاك كل سنة و لو شلتها بتشيل السنة كلها يا حلو حتى لو مش شايل مواد غيرها ودا من العيوب طبعا
والمواد الي مش بتاعت تمريض بتبقي تقريبا زي مواد صيدله الي هما فارما وبايو .. ومواد علاج طبيعي وطب بشري .. وفسيولوجي وتشريح وهستولوجي وميكرو.. بالبلدي كداا بنلم من كله يعني
وبتدرس طول الاربع سنين .. التخصصات والاقسام الي بتلاقيها بعد كده لما تيجي تشتغل (زي باطنة وجراحه و نساء وتوليد وطوارئ وطب شرعي واطفال وعظام ورمد)
وخامس سنة بقا بتبقي سنة الامتياز مش بتكون دراسة دي بتكون تدريب عملي في المستشفي علي كل حاجة أخدتها في الكلية وبيقي ليك مرتب 250 تحت اسم "مكافأة" ..
وممكن تستلم الامتياز علي طول بعد ما النتيجه تظهر او ممكن تأجله وساعتها لو اجلته تقدر تشتغل في اي مستشفي خاصه والمرتب فيها بيقي حلو وجدا وطلبة الامتياز بيقوا مطلوبين
وبعد الامتياز على طول هيبقي ليك تكليف او بيجيلك جواب تعيين بمعني اصح في المستشفيات الحكومي.. ودا هتاخد فيه حوالي 1200 في الشهر .. وده بيقي شغلك الاساسي بعد كده وبتتثبت في المستشفى كأخصائي تمريض وممكن تشتغل اخصائي في اي قسم مش شرط قسم معين
والكلية عموما بتتطلع منها بمؤهل عالي "بكالوريوس تمريض" والتعيين والتكليف بيجيلك كأخصائي تمريض مش ممرض .. بمعنى انك بتكون مشرف على طقم التمريض في قسم من أقسام المستشفى .. اي قسم بقى من الي كنت بتدرسهم طول الاربع سنين زي باطنة او جراحة او اطفال او اي حاجه .. فانت بتبقي مشرف علي الطقم الممرضين الي في القسم ده الي بيبقوا متخرجين من معهد او مدرسه او اكاديميه تمريض
والفرق عموما بين التمريض والطب
ان الدكتور بيشخص الحالة وبيوصف العلاج بس اخصائي التمريض بيراجع العلاج والتشخيص .. وبيقي مسؤول عن كل طقم الممرضين عشان كده لازم يبقي فاهم في كل تفصيله في شغل الممرضين عشان لو فيه غلط يقدر يلحقه ويحاسب عليه الممرض
يعني عندك مثال علي الي بنقول .. اخصائي التمريض في العمليات والتعقيم بيقي نوعين .. النوع الأول ده بيساعد الدكتور أثناء العملية ليس إلا .. والنوع التاني مسؤول عن تجهيز اوضه العمليات وتعقيمها وتعقيم الأدوات الي فيها وتجهيز المريض يعني بيتعب شوية في شغله
وزي ما قلنا ان التمريض بيدرس نفس مواد طب بس على اصغر شويه ومش بتعمق زي طب زي ما بالظبط بتوع طب بيدوسوا مواد تمريض على اصغر شويه
الكلية مستقبلها كويس جدًا لانك بتتخرج و تشتغل علي طول وتتثبت في شغل تبع الحكومه .. دا غير انك ممكن تنزل تشتغل او تتدرب وانت بتدرس عادي في اي مستشفي خاصه
طيب نيجي لبعد التخرج وبعد التكليف .. هنلاقي ناس بتقف لحد هنا وتقولك انا شغال وبقبض وفيه ناس مش هتكتفي بكدا وهتكمل
والناس الي بتكمل ديه بيقي قدامها مليون سكه والتانيه تكمل فيها
أول حاجة هيا دبلومة تمريض عسكري وبتبقي بعد الامتياز وعباره عن ٦ شهور .. وبيقي قدامك عموما الجيش او الشرطه علي حسب ما تحب .. وبعدها بتشتغل في مستشفيات الجيش او الشرطه .. والموضوع ده حلو جدا وفلوسه حلوة "حاجة فُل أهي "
وفيه غير كده كمان دبلومة تحاليل طبيه وبعدها تقدر مع نفسك تفتح معمل تحاليل
وعندك سكة الماجستير .. وبتبقي ٣ سنين .. بتدرس فيه فرع من فروع التمريض .. وبيديك فرصه انك تدرس في الكلية .. ويزودلك في مكانتك ومرتبك لو فكرت تسافر
تالت حاجة هي الزمالة : و دي دراسة بتعملها لما تخلص الكلية:
زي زماله المعهد البريطاني وديه مرتبتها بتوصل ٣ الاف واكتر وديه كويسه جدا
وفيه زمالة مكافحة العدوى بتبقي مدتها 3 سنين وبعدها بتكون استشاري مكافحة عدوى وبيكون ليك وضعك في المستشفي و مرتب كويس كمان
وعندك زمالة المعلوماتية الصحية وبتبقي سنتين و بتتخرج منها أخصائي معلوماتية صحية و بيكون مجالك في الكمبيوتر information technology جوه في المستشفي
وفيه زمالة الإرواء قلبي و دي بتتخرج منها أخصائي إرواء القلب ودا بيقي موجود في عمليات القلب المفتوح لما بيوقفوا القلب بيشغل جهاز القلب الصناعي .. ومهمته بتبقي تقيله لانه هو الي بيدي الاوامر ولازم يبقي عارف ازي يتعامل مع الجهاز كويس
وفيه زمالات تانيه زي زماله الاطفال والتخدير
اخر مجال عندك هو الدبلومة .. وديه بتبقي مكلفه شويه واقل فايده من الحاجات التانيه الي قلنا عليها .. بس عموما الدبلومات زي مكافحه العدوي infection control ويتبقي ٦ شهور او دبلومة الاداره او الجوده
وبشكل عام الكليه ديه من اكتر الكليات الي ليها مجالات شغل .. مش زي ما احنا مفكرين نهائي
يارب نكون غطنالكم كل حاجه في بالكم عن الكلية .. وربنا يكتبلكم الخير في الي جاي