◾كلية لو اتعلمت فيها صح هتساعد ناس كتير قبل ما هتساعد نفسك 🤔
- كلامنا في البوست ده هيكون عن :
《كلية علوم ذوي الإحتياجات الخاصة 》
◾الكلية من الكليات الجديدة في مصر ، موجوده في جامعتين بس هما الزقازيق وبني سويف
◾أول سنة دراسية بدءت فيها الكلية ونزلت في التنسيق كانت سنة 2017 / 2016
◾الكلية لطلاب الثانوية العامة بمختلف الشُعب يعني علمي علوم ورياضة وأدبي 🤓
◾في جامعة الزقازيق الكلية اسمها 《علوم الإعاقة والتأهيل》 أما في بني سويف فهي اسمها 《علوم ذوي الإحتياجات الخاصة 》♿
◾هل في فرق بين الإتنين؟ 👀
- آه في فرق مش كبير بس هنعرفه لما نكمل👌
◾الكلية فيها برنامجين أو قسمين
- البرنامج 1 《التربوي 》 : ده بقى البرنامج الأكاديمي و من خلاله بتقدر تكون مدرس وبتتخصص بقى ك مدرس
ودا بيعتمد علي المجموع فقط وملوش علاقة بالدرجات في المواد ✔️.. الا لو القسم عليه رغبات كتير بيحطوا ليه درجات
- شُعبة علمي علوم بتختار تخصص علوم، عربي، انجليزي
- شُعبة أدبي بتختار تخصص دراسات، عربي، انجليزي
- شعبة رياضة كام في قسم علوم الحاسب لكن اتقفل للأسف عشان الإقبال قليل عليه.. موقع رؤية التعليمي
- التخصص بيبدء من سنة 1
⚫ سؤال مهم
- لما اتخرج هشتغل إيه ؟!
- تخصص تربوي بيأهلك تشتغل مدرس في الأساس في المدارس الخاصة بذوي الاحتياجات الخاصة او مدرس في المدارس العادية لأنك بتكون مؤهل للتعامل مع كل الفئات👌
◾البرنامج 2 《الإختصاصي》:
- ده بقى قسم الإعاقة وبيحتوي على 5 شُعب هي :
- الإعاقة البصرية
- الإعاقة السمعية
- التوحد
- اضطرابات اللغة والتخاطب
- صعوبات التعلم
- قسم عربي ودراسات وعلوم لهم إعاقات متاحة وهم صعوبات تعلم وعقلي وسمعي وبصري..
- اما انجليزي صعوبات تعلم وسمعي وبصري فقط..
◾بالنسبة لمجالات الشغل ؟
- لما بتتخرج من الكلية بتقدر تبقى مترجم بلغة الإشارة
- أخصائي توحد في مراكز التوحد والتخاطب
- بتقدر تشتغل في مراكز التأهيل النفسي والمستشفيات النفسية المهتمة بذوي الإحتياجات الخاصة
- طبعا مجال التدريس في الجامعة 《ذاكر بقى》
- المراكز خارج مصر بقى وخصوصا دول الخليج وبعض الدول الأوروبية والآسيوية المهتمة بذوي الإحتياجات الخاصة 🤞
◾دلوقتي بقى إيه الفرق بين الكلية في بني سويف والزقازيق ؟
- الفرق إنه من بني سويف بتتخرج أخصائي تربوي يعني بتجمع بين البرنامجين أما الزقازيق فبتبقى تخصص إما تربوي أو أخصائي
- كمان في قسم في بني سويف اسمه موهبة مش موجود في الزقازيق عشان كدا اسمها ذوي احتياجات مش علوم إعاقة
- علفكرة ممكن تعمل دبلومة لمدة سنة لو إنت تربوي بس وتبقى أخصائي كمان✔
◾مدة الدراسة في الكلية 4 سنين وشغالة بنظام الساعات المعتمدة
- لما بتقدم في الكلية بيتعملك إختبار صغير كده عشان يعرفوا قدرة تحملك على الكلية وكمان يحددوا قدراتك الجسدية والذهنية ويقولولك تقرأ كلمات عشان يتأكدوا من عدم وجود لدغات، ولو عندك لدغات متقلقش هيبقي متاح ليك الاقسام ما عدا تخاطب بس..
◾لازم تتأكد مليون مره من نفسك قبل ما تدخل الكلية دي لأنها محتاجة صبر ومجهود وحب كمان عشان تقدر تكمل فيها
- في الآخر بنشكرك جداً على مجهودك الرائع ال هتبذله إذا قررت تدخل الكلية دي وبنشجعك
بالتوفيق👋